இக்கிராமத்தில் ஆண்டிற்கு இருமுறை நுகர்பொருள் வாணிபக் கழகம் சார்பில் நெல் கொள்முதல் செய்யப்படும். சேண்டலை பட்டி, கீழவளவு, கொங்கம்பட்டி உள்ளிட்ட கிராமங்களில் இருந்து இதுவரை 11 ஆயிரத்திற்கும் மேற்பட்ட நெல் மூடைகள் கொண்டு வரப்பட்டுள்ளன. இதில் 4 ஆயிரம் மூடை நெல் துாற்றி, எடை வைக்கப்பட்டு அடுக்கி வைக்கப்பட்டுள்ளன. கோடவுனிற்கு கொண்டு செல்ல லாரிகள் வராததால் நெல்மூடைகள் தேங்கி கிடக்கின்றன.

விவசாயிகள் கூறியதாவது: ஏக்கருக்கு ரூ.35 ஆயிரம் செலவு செய்து அறுவடை செய்த நெல்லை பத்து நாட்களுக்கும் மேலாக திறந்த வெளியில் குவித்து வைத்துள்ளோம். எடை வைத்த நெல்லை ஏற்றாததால் இடப்பற்றாக்குறையால் மீதமுள்ள 7 ஆயிரம் மூடை நெல்லை எடை வைக்கவில்லை. தவிர நுாற்றுக்கும் மேற்பட்ட ஏக்கரில் நெல் அறுவடை செய்ய முடியாமல் வயலில் நெல் உதிர்வதோடு, குருணையாக உடையும் அவலம் நிலவுகிறது. மாவட்ட நிர்வாகம் நடவடிக்கை எடுக்க வேண்டும் என்றனர்.