அரசு, உதவி பெறும் கல்லுாரிகளில் உதவி பேராசிரியர் பணியிடங்களுக்கான கல்வி தகுதியாக யு.ஜி.சி., நடத்தும் நெட், மாநில அரசு நடத்தும் 'செட்' தேர்ச்சி அல்லது பிஎச்.டி., பட்டம் பெற்றிருக்க வேண்டும் என்பது விதி.

'நெட்' (தேசிய தகுதி தேர்வு) தேர்வை ஆண்டுக்கு 2 முறை யு.ஜிசி., முறையாக நடத்தி வருகிறது. ஆனால் 'செட்' தேர்வை மாநில அரசு அதுபோல் முறையாக நடத்துவதில்லை. 2018க்கு பின் இந்தாண்டு மார்ச்சில் நடத்தியது. 6 ஆண்டுகளுக்கு பின் நடத்தியதால் அதிக எண்ணிக்கையில் அதாவது 99 ஆயிரம் பேர் விண்ணப்பித்தனர்.

நெட், செட் தேர்வு எழுதியவர்களில் 6 சதவீதம் மட்டுமே தேர்ச்சியாக அறிவிக்க வேண்டும் என்பதும் விதி. 'செட்' தேர்வை ஆண்டுக்கு 2 முறை நடத்தியிருந்தால் ஒவ்வொரு முறையும் 6 சதவீதம் பேருக்கு தேர்ச்சி வாய்ப்பு கிட்டியிருக்கும். தமிழகத்தில் 6 ஆண்டுகளுக்கு பின் செட் தேர்வு நடத்தியதால் அதற்கு ஏற்ப தேர்ச்சி விகிதத்தை 6 சதவீதம் என்பதில் இருந்து அதிகரித்து அறிவிக்க வேண்டும். அப்போது தான் காத்திருப்போரில் பயன்பெறுவோரின் எண்ணிக்கையும் அதிகரிக்க முடியும்.

இதுகுறித்து செட் தேர்வு எழுதி முடிவுக்காக காத்திருப்போர் கூறியதாவது:

தமிழக அரசு 2024ல் காலியாக உள்ள 7 ஆயிரம் உதவி பேராசிரியர் காலியிடங்களில் 4 ஆயிரம் நிரந்தர பணியிடங்களை நிரப்ப அறிவிப்பு வெளியிட்டுள்ளது. இதற்கான தேர்வை எழுதியவர்களில் வழக்கம் போல் 6 சதவீதம் தேர்ச்சி அறிவித்தால் பலர் பாதிப்பர். ஏற்கனவே 2017 ல் நடந்த தேர்வில், அதற்கு முன் 6 ஆண்டுகளாக செட் தேர்வு நடத்தாததை யு.ஜி.சி.க்கு தெரிவித்து 6 சதவீதம் என்பதில் தளர்வு பெற்று 17 சதவீதமாக தேர்ச்சி அறிவிக்கப்பட்டது.

அதுபோல் இந்தாண்டும் யு.ஜி.சி., யிடம் சிறப்பு தளர்வு பெற்று தேர்ச்சி வீதத்தை அதிகரித்து வெளியிட தமிழக அரசு நடவடிக்கை எடுக்க வேண்டும் என்றனர்.