மயிலாடுதுறை மாவட்டம் சீர்காழி தாலுகா மங்கைமடம் பகுதியைச் சேர்ந்தவர் செல்வேந்திரன்.62. தனியார் சர்க்கரை ஆலை தலைமை இயக்குனர். இவரது மகன் வெங்கடேஷ் வெளிநாட்டில் பணியாற்றி வருகிறார். மகள் அமிர்தவர்ஷினி திருமணமாகி வெளியூரில் உள்ளார்.

வீட்டில் செல்வேந்திரன், அவரது மனைவி லட்சுமி, மருமகள் மகேஸ்வரி ஆகியோர் உள்ளனர். கடந்த 6ம் தேதி அமிர்தவர்ஷணியை பிரசவத்திற்காக மயிலாடுதுறையில் உள்ள மருத்துவமனையில் சேர்த்துள்ளனர். அவருக்கு துணையாக செல்வேந்திரன், அவரது மனைவி, மருமகள் மூவரும் மருத்துவமனையிலேயே தங்கி இருந்துவிட்டு குழந்தை பிறந்ததும் நேற்று இரவு வீட்டிற்கு அழைத்து வந்துள்ளனர்.

அப்போது அவர்கள் வீட்டின் பின்புற கதவு உடைக்கப்பட்டு 150 பவுன் தங்க நகைகளை மர்ம நபர்கள் கொள்ளையடித்துச் சென்றது தெரியவந்தது. இதுகுறித்த தகவலின் பேரில் போலீசார் விரைந்து வந்து சம்பவ இடத்தை பார்வையிட்டு விசாரணை நடத்தி வருகின்றனர்.