நாமகிரிப்பேட்டை:தமிழக முதல்வர் ஸ்டாலின் பிறந்தநாள் விழா, நலத்திட்ட உதவிகள் வழங்கும் விழா, உறுதிமொழி ஏற்பு விழா என, 'முப்பெரும்' விழா நாமகிரிப்பேட்டையில், நேற்று மாலை நடந்தது. தி.மு.க., ஒன்றிய செயலாளர் ராமசுவாமி தலைமை வகித்தார். பேரூர் செயலாளர் அன்பழகன் வரவேற்றார். மாவட்ட செயலாளரும், எம்.பி.,யுமான ராஜேஸ்குமார், மாநில கொள்கை பரப்பு செயலாளர் திண்டுக்கல் லியோனி ஆகியோர் கலந்துகொண்டனர்.

தொடர்ந்து, லியோனி பேசியதாவது:முதல்வர் ஸ்டாலின், பெண்களுக்கு உரிமைத்தொகை என மாதந்தோறும், 1,000 ரூபாய் வழங்கி வருகிறார். இதனால், பெண்கள், தன் கணவனை எதிர்பார்க்காமல் தங்களுடைய செலவுகளை தாங்களே செய்து கொள்கின்றனர். இலவச பஸ் பயணம் மூலம் அனைத்து விசேஷசங்களுக்கும், வெளியூர்களுக்கும் பெண்களே போகும் நிலை ஏற்பட்டுள்ளது. மாணவர்களுக்கு, காலை உணவு வழங்கியுள்ளார். உயர்கல்வி பெண்களுக்கு, 1,000 ரூபாய் வழங்குகிறார். இதுபோன்ற செயல்களால் மாணவர்கள் உள்ளிட்ட அனைவரும் அவரை, 'அப்பா' என, அழைக்கின்றனர்.

மும்மொழி கொள்கையை மத்திய அரசு திணிக்கிறது. இதன் மூலம் சமஸ்கிருதத்தை தமிழகத்தில் கொண்டு வர முயற்சிக்கிறது. எனவே வரும், 2026 தேர்தலில், நாமக்கல் கிழக்கு மாவட்டத்தில் உள்ள, மூன்று தொகுதிகளிலும், தி.மு.க., வேட்பாளர்கள் வெற்றி பெற வைக்க வேண்டும்.

இவ்வாறு அவர் பேசினார். சேந்தமங்கலம் எம்.எல்.ஏ., பொன்னுசாமி, இளைஞரணி சுரேஷ், ரமேஷ் உள்பட பலர் கலந்து கொண்டனர்.