இதையடுத்து, சமயசங்கிலி பகுதியில், 16.50 லட்சம் ரூபாயில் கட்டப்பட்டுள்ள அங்கன்வாடி மையத்தில் ஆய்வு செய்தார். அங்கு, குழந்தைகளின் வருகை விபரம், இணை உணவு வழங்குதல், குழந்தைகளின் வயதிற்கேற்ற எடை, உயரம் குறித்து கேட்டறிந்தார். காடச்சநல்லுார், ஐந்துபனை பகுதியில் மகாத்மா காந்தி தேசிய ஊரக வேலை உறுதியளிப்பு திட்டத்தில், 44.9 லட்சம் ரூபாயில் சிறுபாலம் கட்டப்பட்டுள்ளதையும், சீராம்பாளையம் பகுதியில், 'கலைஞர் கனவு இல்லம்' திட்டத்தில் வீடுகள் கட்டப்பட்டு வருவதையும் பார்வையிட்டார். அதை தொடர்ந்து, கல்லங்காட்டுவலசு அரசு ஆரம்ப சுகாதார நிலையத்தில் நோயாளிகளுக்கு அளிக்கப்படும் சிகிச்சை, மருந்துகளின் இருப்பு, ரத்த பரிசோதனை மாதிரி விபரம், நோயாளிகளுக்கான அடிப்படை வசதி, படுக்கை வசதி, கர்ப்பிணிகள் பதிவு விபரம் குறித்து ஆய்வு செய்தார்.