பள்ளிப்பாளையம்: பள்ளிப்பாளையம் அருகே, கணபதிபாளையம் பகுதியில் உள்ள தனியார் மண்டபத்தில், நேற்று மக்களுடன் முதல்வர் திட்ட முகாம் நடந்தது. களியனுார், புதுப்பாளையம், சமயசங்கிலி, களியனுார் அக்ரஹாரம் ஆகிய பஞ்., பகுதியை சேர்ந்த பொதுமக்கள் மனு கொடுத்தனர். இதில், களியனுார் பஞ்., ராமகிருஷ்ணா நகர் பகுதியை சேர்ந்த, 50க்கும் மேற்பட்ட மக்கள் மின்வசதி கேட்டு மனு கொடுக்க வந்தனர். திடீரென, 'பல ஆண்டுகளாக எங்களுக்கு மின் வசதி இல்லை. எங்கள் பகுதிக்கு மின் வசதி உடனடியாக வழங்க வேண்டும்' என, கோரிக்கை வலியுறுத்தி ஆர்ப்பாட்டத்தில் ஈடுபட்டனர். ஈரோடு எம்.பி., பிரகாஷ் பேச்சுவார்த்தை நடத்தியதையடுத்து, ஆர்ப்பாட்டத்தை கைவிட்டனர்.