திருப்பூர் மாவட்டம், காங்கேயம் அருகே சிவன்மலை சுப்ரமணியசுவாமி கோவிலின் தைப்பூச தேர் திருவிழா கடந்த, 2ம் தேதி மலை அடிவாரத்தில் உள்ள வீரகாளியம்மன் கோவில் தேர் திருவிழா நிகழ்ச்சியுடன் துவங்கியது. நேற்று காலை, 6:00 மணிக்கு வீரகாளியம்மன் மலைக்கோவிலுக்கு எழுந்தருளல் நிகழ்ச்சி நடைபெற்றது. பின் சிறப்பு பூஜை,

மயில் வாகன அபிஷேகம், விநாயகர் வழிபாடு நடைபெற்றது.

முருகன் கோவில் சன்னதி முன் உள்ள கொடிமரத்தில், 12:20 மணியளவில் மயில் படம் பொறித்த கொடி ஏற்றப்பட்டது. சுப்ரமணியர், வள்ளி, தெய்வானையுடன் சிறப்பு அலங்காரத்தில் சப்பரத்தில் மலையை வலம் வந்து பக்தர்களுக்கு அருள் பாலித்தார். 1:00 மணிக்கு சுவாமி மலை அடிவாரத்தில் உள்ள நஞ்சுண்டேஸ்வரர் கோவிலுக்கு எழுந்தருளல் பூஜை நடைபெற்றது. தேரோட்டம் வரும், 11ம் தேதி நடைபெறுகிறது. அன்று காலை, 6:00 மணிக்கு மகர புஷ்ய நல்லோரையில் சுவாமி ரதத்திற்கு எழுந்தருளுகிறார். மாலை 4:00 மணிக்கு திருத்தேர் வடம் பிடிக்கப்பட்டு தேரோட்டம் தொடங்குகிறது. 12,13 தேதிகளில் மலையை வலம் வந்து நிலை அடைகிறது. 16ம் தேதி தெப்ப உற்சவம் பரிவேட்டை நடைபெறுகிறது. 17ம் தேதி 10:00 மணிக்கு மஹாதரிசனம் நடைபெறுகிறது. 20ம் தேதி இரவு கொடியிறக்குதல் மற்றும் பாலிகை நீர்த்துறை சேர்த்தலுடன் தேர்த்திருவிழா நிறைவடைகிறது.