'மழை காலத்தில் சின்ன வெங்காயத்தை பாதுகாக்க, வரும், 6ல், 'ஒருங்கிணைந்த பூச்சி மற்றும் நோய் நிர்வாகம்' குறித்து இலவச பயிற்சி முகாம் நடக்கிறது என, நாமக்கல் வேளாண் அறிவியல் நிலைய தலைவர் வேல்முருகன் தெரிவித்துள்ளார்.

இதுகுறித்து, அவர் வெளியிட்ட அறிக்கை: நாமக்கல் கால்நடை மருத்துவ கல்லுாரி வளாகத்தில் அமைந்துள்ள, வேளாண் அறிவியல் நிலையத்தில், வரும், 6ல், காலை, 10:00 மணிக்கு, மழை காலத்தில் சின்ன வெங்காயத்தை பாதுகாக்க, 'ஒருங்கிணைந்த பூச்சி மற்றும் நோய் நிர்வாகம்' என்ற தலைப்பில், ஒரு நாள் இலவச பயிற்சி முகாம் நடக்கிறது. பயிற்சியில், மழைக்காலத்தில் சின்ன வெங்காய பயிரை தாக்கும் பூச்சி, நோய்களை, இயற்கை மற்றும் செயற்கை முறையில் கட்டுப்படுத்தும் முறைகள், வளர்ச்சியூக்கிகள், குறைந்த செலவில் அதிகம் லாபம் பெற தேவையான தொழில் நுட்பங்கள் குறித்து பயிற்சி அளிக்கப்படுகிறது. இதில், விவசாயிகள், விவசாயம் கலந்த களப்பணியாளர்கள், பண்ணையாளர்கள், ஊரக மகளிர், இளைஞர்கள் மற்றும் ஆர்வம் உள்ளவர்கள் கலந்துகொள்ளலாம். விருப்பம் உள்ளவர்கள், வேளாண் அறிவியல் நிலையத்தை நேரிலோ அல்லது 04286-266345, 266650 என்ற தொலைபேசி எண்கள் மூலமோ தொடர்பு கொண்டு, தங்களது பெயரை முன்பதிவு செய்து பயன்பெறலாம். இவ்வாறு அதில் கூறப்பட்டுள்ளது.