* ராசிபுரம் அடுத்த புதுப்பாளையம் அங்காள பரமேஸ்வரி அம்மன் மாசானத்தாய் கோவிலில், மகா சிவராத்திரி விழா நடந்தது. மயான கொள்ளை நிகழ்ச்சி நடப்பதற்கு முன், சுவாமிக்கு பக்தர்கள் பழம் படைக்கும் நிகழ்ச்சி நடந்தது. இதில், 100க்கும் மேற்பட்ட பக்தர்கள் பழங்கள் எடுத்துக்கொண்டு, நடனமாடியபடி ஊர்வலமாக வந்தனர். பின், பக்தர்கள் கொண்டு வந்த பழம், மொச்சை கொட்டை ஆகியவற்றை அம்மனுக்கு படையலிட்டு பூஜை செய்தனர். பூஜை முடிந்தவுடன் பக்தர்களுக்கு அன்னதானம் வழங்கப்பட்டது. தொடர்ந்து மாலை மயான கொள்ளை நிகழ்ச்சி நடந்தது.

* ராசிபுரம் அருகே, ஆர்.புதுப்பாளையத்தில் பழமையான நாகமாயம்மன் கோவில் உள்ளது. நேற்று அதிகாலை, 3:30 மணிக்கு அம்மனுக்கு அபிஷேகம், அலங்காரம், முகம் எடுத்து ஆடும் நிகழ்ச்சி நடந்தது. இதில், மூங்கில்களை வைத்து படலாக கட்டி, அரிசி மாவில் ஐந்து வித்தியாசமான முகம் போன்ற உருவங்களை தயார் செய்து, மா இலை, தீப்பந்தம் வைத்து, 15 கிலோ எடை கொண்ட அந்த உருவத்தை துாக்கி ஆடிக்கொண்டு, கோவிலிலிருந்து மயானம் வரை செல்வர். பின், மயானத்தில் காவு சோறு கொடுக்கப்படும். அவ்வாறு கொடுக்கப்படும் காவு சோறை உட்கொண்டால் குழந்தை இல்லாத தம்பதிகளுக்கு, விரைவில் குழந்தை பாக்கியம் கிடைக்கும் என்பது நம்பிக்கை.