சோமனூர் அடுத்த தொட்டிபாளையத்தில் சித்தி விநாயகர் கோவில், ஸ்ரீ மாகாளியம்மன் கோவில், கன்னி மூல கணபதி, முருகன், வெள்ளையம்மாள், சிவ துர்க்கை அம்மன் கோவில்கள் பழமையானவை.

இங்கு, வர்ணம் தீட்டுதல் உள்ளிட்ட திருப்பணிகள் முடிந்து, கடந்த, 8ம் தேதி காலை கணபதி ஹோமத்துடன் கும்பாபிஷேக விழா துவங்கியது. சாமளாபுரம் சோழீஸ்வரர் கோவிலில் இருந்து தீர்த்தக் குடங்கள் மற்றும் முளைப்பாரி மேள, தாளத்துடன் எடுத்து வரப்பட்டன.

மாலை, 6:00 மணிக்கு, விக்னேஸ்வர பூஜை, வாஸ்து சாந்தி, கும்பஸ்தாபனம் மற்றும் முதல்கால ஹோமம், பூர்ணாகுதி நடந்தது. நேற்று முன்தினம் இரு கால ஹோமங்கள் மற்றும் அஷ்ட பந்தன மருந்து சாத்துதல் நடந்தது.

நேற்று காலை, 5:00 மணிக்கு, நான்காம் கால ஹோமம், பூராணாகுதி முடிந்து, புனித நீர் கலசங்கள் மேள தாளத்துடன் கோவிலை சுற்றி எடுத்து வரப்பட்டன. 7:00 மணிக்கு, விமானம் மற்றும் ஸ்ரீ சித்தி விநாயகர், ஸ்ரீ மாகாளியம்மனுக்கு கும்பாபிஷேகம் நடந்தது.

இதில், ஆயிரக்கணக்கான பக்தர்கள் பங்கேற்று வழிபட்டனர். தொடர்ந்து, மகா அபிஷேகம், அலங்கார பூஜைகள் நடந்தன. சிறப்பு அலங்காரத்தில் அம்மன் பக்தர்களுக்கு அருள்பாலித்தார். பாரம்பரிய காவடி ஆட்டம், ஒயிலாட்டம், வள்ளி கும்மி ஆட்டம் நடந்தது.

திருப்பணி குழுவினர் விழா ஏற்பாடுகளை செய்திருந்தனர்.