நீலகிரியில், ஊட்டி, குன்னுார், குந்தா, கோத்தகிரி, கூடலுார், பந்தலுார் ஆகிய தாலுகா பகுதிகளில், 37 ஆரம்ப சுகாதார நிலையம், 216 துணை சுகாதார நிலையங்கள் செயல்பட்டு வருகின்றன.

மாவட்டத்தில் கர்ப்பம் தரித்த கர்ப்பிணி தாய்மார்கள் அந்தந்த பகுதியில் உள்ள ஆரம்ப சுகாதார நிலையம், துணை சுகாதார நிலையங்களில் பதிவு செய்ய வேண்டும். பதிவு செய்த பின், சுகாதார துறையினர் தெரிவிக்கும் வழிமுறைகளை பேரு காலத்தில் கட்டாயம் கடைப்பிடித்து பாதுகாப்பாக பிரசவிக்க வழிமுறைகளை சுகாதார துறையினர் அறிவுறுத்தி வருகின்றனர்.

சுகாதார துறை வழிமுறைகள்

கர்ப்பிணி தாய்மார்கள் கர்ப்பம் என்று தெரிந்தவுடன் தங்களது பகுதியில் உள்ள கிராம சுகாதார செவிலியர்கள் அல்லது கிராம சுகாதார தன்னார்வலர்களை ( ஆஷா பணியாளர்கள்) அணுகி பி.ஐ.சி.எம்.இ., போர்டல் மூலம் முன்பதிவு செய்து கொள்ள வேண்டும்.

அருகில் உள்ள அரசு ஆரம்ப சுகாதார நிலையத்திற்கு சென்று தங்களின் உடல் எடை, உயரம், ரத்த அழுத்தம், ஹீமோகுளோபின் மற்றும் தைராய்டு போன்ற பரிசோதனைகள் மேற்கொள்ள வேண்டும்.

கர்ப்பத்தை பதிவு செய்தவுடன் 'ரணஜன்னி, டி.டி-2' ஆகியவற்றை, அருகில் உள்ள அரசு ஆரம்ப சுகாதார நிலையத்தில் செலுத்தி கொள்ள வேண்டும்.

சிக்கலான கர்ப்பிணி தாய்மார்கள் ரத்த சோகை, தைராய்டு, வலிப்பு நோய், இருதய நோய் கர்ப்ப கால சர்க்கரை நோய் கண்டறியப்பட்ட பின், மருத்துவர் மூலம் பரிந்துரைக்கப்பட்ட மருத்துவமனையில் சிகிச்சை பெற்று கொள்ள வேண்டும்.

சிக்கலான கர்ப்பிணி தாய்மார்கள், 15 நாட்களுக்கு ஒரு முறை அருகில் உள்ள அரசு மருத்துவமனைகளில் பரிசோதனைக்கு செல்ல வேண்டும்.

கர்ப்பிணி தாய்மார்கள் கர்ப்ப காலத்தில் முதல் ஏழு மாதம் வரை, மாதம் ஒரு முறையும் எட்டு மற்றும் ஒன்பதாவது மாதங்களில் இரண்டு முறையும், அதற்குப் பின் பிரசவம் வரை வாரம் ஒரு முறை கட்டாயம் பரிசோதனைக்கு செல்ல வேண்டும்.

திருமணமான அனைத்து பெண்களும் கர்ப்பம் தரிக்கும் முன், 6 மாதம் காலத்திற்கும் மற்றும் கர்ப்பம் தரித்த முதல் மூன்று வாரம் வரை 'போலிக் அமில' மாத்திரையை உட்கொள்ள வேண்டும்.

நான்காவது மாதம் முதல் பிரசவம் முடிந்து ஆறு மாதம் காலம் வரை இரும்புச்சத்து மற்றும் சுண்ணாம்பு சத்து மாத்திரைகளை உட்கொள்ள வேண்டும்.

மேற்கண்ட வழிமுறைகளை அனைத்து கர்ப்பிணி தாய்மார்களும் பின்பற்றி சுகமான மற்றும் பாதுகாப்பான பிரசவத்தை மேற்கொள்ள வேண்டும்.

இதற்கான விழிப்புணர்வு மாவட்டம் முழுவதும் ஏற்படுத்தப்பட்டு வருகிறது.