குன்னுார் தேயிலை ஏல மையத்தில், கடந்த வாரம் இறுதியில் நடந்த, 26வது ஏலத்தில், '20.18 லட்சம் கிலோ இலை ரகம்; 5.30 லட்சம் கிலோ டஸ்ட் ரகம்,' என, மொத்தம், 25.48 லட்சம் கிலோ ஏலத்திற்கு வந்தது.

'13.53 லட்சம் கிலோ இலை ரகம்; 3.83 லட்சம் கிலோ டஸ்ட் ரகம்,' என, மொத்தம், 17.36 லட்சம் கிலோ விற்பனையானது. சராசரி விலை கிலோவிற்கு, 96.94 ரூபாய் என இருந்தது; சராசரி விலையில் கிலோவிற்கு, 2 ரூபாய் சரிந்தது.

மொத்த வருமானம், 16.83 கோடி ரூபாய் கிடைத்தது. கடந்த ஏலத்தை ஒப்பிடுகையில், வரத்து அதிகரித்த போதும், விற்பனை குறைந்ததுடன், விலை வீழ்ச்சியும் ஏற்பட்டதால், 1.40 கோடி ரூபாய் மொத்த வருவாய் சரிந்தது.

'டீசர்வ' ஏலம்

நீலகிரி, கூட்டுறவு தொழிற்சாலைகளில் உற்பத்தி செய்யும் தேயிலை துாள், டீசர்வ் ஏல மையத்துக்கு, 1.73 லட்சம் கிலோ வந்ததில், 1.37 லட்சம் கிலோ விற்பனையாகியது. சராசரி விலை, 88.66 ரூபாயாக இருந்தது; கிலோவிற்கு ஒரு ரூபாய் சரிந்தது. 1.22 கோடி ரூபாய் மொத்த வருவாய் கிடைத்தது.

கோவை ஏல மையத்தில் நடந்த ஏலத்தில், 5.41 லட்சம் கிலோ வந்ததில், 4.19 லட்சம் கிலோ என 77.40 சதவீதம் விற்பனையானது. சராசரி விலை கிலோவிற்கு, 122 ரூபாயாக இருந்தது; 5.11 கோடி ரூபாய் மொத்த வருவாய் கிடைத்தது. 50 லட்சம் ரூபாய் மொத்த வருமானம் உயர்ந்தது.

கொச்சி ஏல மையத்தில், 10.09 லட்சம் கிலோ வந்ததில், 8.39 லட்சம் கிலோ விற்பனையானது. சராசரி விலை, 152.56 ரூபாய் என இருந்தது. 12.81 கோடி ரூபாய் மொத்த வருவாய் கிடைத்தது.

சராசரி விலை குறைந்ததால், மொத்த வருவாய் சரிந்தது. தென் மாநில அளவில், 35.52 கோடி ரூபாய் மொத்த வருவாய் கிடைத்த நிலையில், கடந்த ஏலத்தை விட, 2.87 கோடி ரூபாய் மொத்த வருவாய் சரிந்தது.