குமாரபாளையத்தில், 150 ஆண்டுகள் பழமையான வட்டமலை ஆண்டவர் கோவில் உள்ளது. இக்கோவிலில் 14ம் ஆண்டு பங்குனி உத்திரத் தேர்த்திருவிழா நேற்றுமுன்தினம் துவங்கியது.

மாகாளியம்மன் கோவிலில் கிராம தேவதை வழிபாடும், கிராம சாந்தி பூஜையும் நடந்தது. நேற்று காலை 6:00 மணிக்கு கணபதி பூஜை துவங்கியது. பக்தர்களுக்கு காப்பு அணிவிக்கப்பட்டது.

கோவில் உட்பிரகாரத்தில் உலாவரும் நிகழ்ச்சி நடந்தது. காலை 9:30 மணிக்கு கொடியேற்றம் நடந்தது. குமாரபாளையம், ஆலாம்பாளையம், அன்னூர் சுற்றுவட்டாரத்தை சேர்ந்த திரளான பக்தர்கள் பங்கேற்றனர். அன்னதானம் வழங்கப்பட்டது. வரும் 23ம் தேதி காலை யாகசாலை பூஜை நடக்கிறது. மாலை 5:00 மணிக்கு சுவாமி திருக்கல்யாண உற்சவமும், யானை வாகனத்தில் சுவாமி உலா வருதலும் நடக்கிறது.

24ம் தேதி காலை 10:30 மணிக்கு காவடி ஆட்டத்துடன் தேரோட்டம் துவங்குகிறது. சிரவை ஆதினம், குமரகுருபர சுவாமிகள் வடம் பிடித்து தேரோட்டத்தை துவக்கி வைக்கிறார். இரவு பவளக்கொடி கும்மியாட்டம் நடக்கிறது.

25ம் தேதி இரவு 7:00 மணிக்கு பரிவேட்டை, ஸ்ரீ வட்டமலை ஆண்டவர் கலைக் குழுவின் கும்மியாட்டம், தெப்போற்சவம், நடக்கிறது.