நீலகிரி மாவட்டம், குன்னுார் மற்றும் சுற்றுப்புற பகுதிகளில் கடந்த இரண்டு நாட்களாக நள்ளிரவில் கன மழை பெய்து வருகிறது. நேற்று காலை, 8:00 மணி நிலவரப்படி குன்னுாரில், 6.2 செ.மீ., மழையளவு பதிவானது.

இந்நிலையில், குன்னுார் மலை ரயில் பாதையில், ரன்னிமேடு, ஆடர்லி, ஹில்குரோவ் உள்ளிட்ட இடங்களில் கற்களுடன் மண்சரிவு தண்டவாளத்தில் விழுந்தன. மண்; கற்களை அகற்றும் பணியில் ரயில்வே ஊழியர்கள் ஈடுபட்டு வருகின்றனர்.

இதனால், நேற்று மேட்டுப்பாளையத்தில் இருந்து காலை, 7:10 மணிக்கு ஊட்டி நோக்கி புறப்பட்ட மலை ரயில் ரத்து செய்யப்பட்டு, சுற்றுலா பயணிகளுக்கு டிக்கெட் தொகை திருப்பி வழங்கப்பட்டது.

இரவு வரை பணிகள் நிறைவு பெறாததால், இன்றும் (அக்.,1) மேட்டுப்பாளையம் மலை ரயில் ரத்து செயயப்படுகிறது. அதே வேளையில், ஊட்டி- குன்னுார் இடையே இயக்கப்படும் மற்ற ரயில்கள் பாதிப்பின்றி இயக்கப்படுகிறது.