மின் உற்பத்திக்கான அணைகளில் தண்ணீர் இருப்பு நிலவரம் (அடி): -- 1. முக்குறுத்தி-:18---17 2. பைக்காரா-:100--96 3. சாண்டி நல்லா:-49---46 4. கிளன் மார்கன்-: 33--32 5. மாயார்-: 17--16 6. அப்பர் பவானி: -210- -200 7. பார்சன்ஸ்வேலி: 60-- 55 8. போர்த்தி மந்து:130--120 9. அவலாஞ்சி :171--160 10. எமரால்டு-: 184--174 11. குந்தா-: 89--88 12. கெத்தை-: 156--154 13. பில்லூர்-: 100--98

அணையை பராமரிக்க வேண்டும்

வினோத் குமார், நீலகிரி தன்னார்வலர்கள் கூட்டமைப்பு மாவட்ட செயலாளர்: குன்னுார் மக்களின் குடிநீர் தேவையை பூர்த்தி செய்யும் ரேலியா அணை நகரின் குடிநீர் தேவையை பூர்த்தி செய்து வருகிறது. அணையின் தண்ணீர் வெளியேறும் இடங்களில் உள்ள கற்கள் இடையே செடிகள் புதர்கள் வளர்ந்துள்ளன. செடிகள் வளர்வதால் ஏற்படும் வெற்றிடம் சேதமடைய வாய்ப்பு உள்ளது என கட்டட நிபுணர்கள் தெரிவித்து வருகின்றனர். பாதிப்பு ஏற்படும் முன்னதாகவும், பாதிப்பு இல்லாத வகையிலும் இவற்றை பாதுகாக்கப்பட வேண்டும். அணையில் இருந்து உபரி நீர் வெளியேறி வீணாவதை தடுக்க அந்த இடத்தையும் பராமரித்து கூடுதலாக சேமிக்கவும் திட்டங்கள் வகுக்கப்பட வேண்டும். கீழ் பகுதியில் விபரம் அடங்கிய கல்வெட்டும் பராமரிக்கப்படாமல் உள்ளது. இதனை பராமரித்து பாதுகாக்க வேண்டும்.

வீணாகும் தண்ணீரை சேமிக்க வேண்டும்

அருண், விவசாயி, கூடலுார்: கூடலுார் பாண்டியாறு- புன்னம்புழா ஆற்று நீர் இப்பகுதியில் உள்ள வன விலங்குகளுக்கும், சிறு விவசாயிகளுக்கு பயன்படுகிறது. மீதமுள்ள தண்ணீர் கேரளாவுக்கு சென்று கடலில் கலக்கிறது. இந்த தண்ணீரை கொண்டு மின் உற்பத்தி செய்யும் திட்டம், பல ஆண்டுகளாக கிடப்பில் போடப்பட்டுள்ளது. இந்நிலையில், வீணாகும் தண்ணீரை பயன்படுத்தும் வகையில், இந்த ஆற்று நீரை மாயாற்றுடன் இணைத்தால் பவானி விவசாயிகள் பயன்பெற வாய்ப்புள்ளது.

300 மெகாவாட் மின் உற்பத்தி அதிகரிப்பு

நடப்பாண்டில் மார்ச் மாதம் வரை, அணைகளில் தண்ணீர் இருப்பு குறைவால், தினசரி, 350 மெகாவாட் வரை மின் உற்பத்தி மேற்கொள்ளப்பட்டு வந்தது. அதன்பின் மழை தொடர்ந்து பெய்ததால், தற்போது, தினசரி மின் உற்பத்தி, 650 மெகாவாட்டாக அதிகரித்துள்ளது. அடுத்து வரும் வடகிழக்கு பருவமழை குறைந்தாலும் மின் உற்பத்தியை சமாளிக்க முடியும் என்ற சூழ்நிலை உருவாகி உள்ளது.

மழையை கொண்டாடுவோம்

பெள்ளியப்பன், சமூக ஆர்வலர், ஊட்டி: நீலகிரி மாவட்டத்தில் கடந்த காலங்களில் பருவமழை என்பது தற்போது விட அதிகமாக பெய்வது வழக்கம். காலநிலை மாற்றம். வன அழிவு ஆகியவற்றால் கடந்த சில ஆண்டுகளாக மழை குறைவாக பெய்து வந்தது. நடப்பாண்டு சரியான கால கட்டத்தில் மழை பெய்து வருவதால், இதனை அதிக மழை என்ற பலரும் கூறுகின்றனர். இதேபோன்று மழை ஆண்டுதோறும் தொடர்தால் மட்டுமே நம் மாவட்ட விவசாயத்துக்கு தேவையான தண்ணீரை நிறைவு செய்ய முடியும். மேலும், அனைத்து பகுதிக்கும் குடிநீர் தேவையும் பூர்த்தியாகும். அதனால், மழையை அனைவரும் கொண்டாட வேண்டும். இயற்கை விவசாயத்தை போற்ற வேண்டும்.

விவசாயம் செழிக்க வேண்டும்

சிவதாஸ், சுற்றுச்சூழல் ஆர்வலர், ஊட்டி: நீலகிரி உயிர்ச் சூழல் மண்டலத்தில் தற்போது மழை தாக்கம் அதிகரித்துள்ள சூழ்நிலையில் இயற்கை வளம் அதிகரித்து, விவசாயத்திற்கும், மின் உற்பத்திக்கும் மிகவும் பயனுள்ளதாக உள்ளது. நீராதாரத்திற்கு முக்கியத்தும் பெற்ற சோலை வனங்கள், புல்வெளிகள் பயனுள்ளதாக இருக்கிறது. தமிழகம், கேரளா பகுதிகளுக்கு தண்ணீர் மிகுந்த பயனுள்ளதாக இருக்கிறது. இது போன்று பருவ மழை ஆண்டுதோறும் பொழிந்தால் விவசாயம் செழிக்கும்.

கைவிடப்பட்ட குடிநீர் திட்டம்

கோத்தகிரியில் கடந்த, 35 ஆண்டுகளுக்கு முன் கட்டப்பட்ட தடுப்பணையில் இருந்து, கேர்பெட்டா புதுார் பகுதியில் கட்டப்பட்டுள்ள, சுத்திகரிப்பு நிலையத்தில் நீர் சுத்தி கரிக்கப்படுகிறது. பிறகு சக்திமலை 'மெகா' குடிநீர் தொட்டியில் தேக்கி வைத்து, நாகரின் தாழ்வான பகுதியில் அமைந்துள்ள குடியிருப்புகளுக்கு வினியோகிக்கப்படுகிறது. இந்த அணை தண்ணீர் ஆரம்ப காலத்தில் போதுமானதாக இருந்தது. நாளடைவில் மக்கள் தொகை அதிகரிப்பால், சப்ளை செய்வதில் தட்டுப்பாடு நிலவுகிறது. இதனை கருத்தில் கொண்டு, கடந்த, 5 ஆண்டுகளுக்கு முன்பு, 'அளக்கரை மெகா குடிநீர் திட்டம்,' 13 கோடி ரூபாய் செலவில் செயல்படுத்தப்பட்டது. ஆனால், வெள்ளோட்டம் விடப்பட்டதோடு, திட்டம் கைவிடப்பட்டது. தற்போது, ஜல் ஜீவன் திட்டத்தில், நகரப் பகுதியில் உள்ள அனைத்து குடியிருப்புகளுக்கும் தேவையான தண்ணீர் கிடைக்க ஏதுவாக, பல கோடி ரூபாய் செலவில் பணிகள் நடந்து வருகிறது. இந்த திட்டம் கைக்கூடும் பட்சத்தில், வரும் நாட்களில் நகர மக்களுக்கு தண்ணீர் தட்டுப்பாடு இருக்காது.