நீலகிரி மாவட்டம், ஊட்டி சுற்றுவட்டார பகுதிகளில் உருளை கிழங்கு,கேரட், பீட்ரூட் உள்ளிட்ட மலை காய்கறிகள் அதிகளவில் உற்பத்தி செய்யப்படுகிறது. உற்பத்தி செய்யப்படும் மலை காய்கறிகள், ஊட்டி மார்க்கெட் சந்தைக்கு கொண்டு வந்து விற்கப்படுகிறது.

பின், தரம் பிரிக்கப்பட்டு, கேரளா, கர்நாடகா மற்றும் தமிழகத்தின் பிற மாவட்டங்களுக்கு கொண்டு செல்லப்படுகிறது. சமீப காலமாக, ஊட்டியில் விளைவிக்கப்படும் மலை காய்கறிகளுக்கு ஓரளவுக்கு விலை கிடைத்து வருகிறது. அதில், ஊட்டி பீட்ரூட் கடந்த வாரம் கிலோ, 30க்கு விற்பனையானது. நல்ல விலை கிடைப்பதால் விவசாயிகள் அவசர, அவசரமாக பீட்ரூட் அறுவடை பணியில் ஈடுபட்டு வருகின்றனர்.

இந்நிலையில், நேற்று கிலோ, 40 ரூபாய்க்கு விற்கப்பட்டது. 'ஒரு துண்டு' எனப்படும், 80 கிலோ மூட்டை,3,200 ரூபாய்க்கு விற்கப்பட்டது. இதனால், கூடுதல் லாபம் கிடைத்து வருவதால் சிறு விவசாயிகள் மகிழ்ச்சி அடைந்துள்ளனர்.