நீலகிரி மாவட்டத்தில் டிச., முதல் பிப்., இறுதிவரை பனிப்பொழிவு இருக்கும். நடப்பாண்டு, மழை, மேகமூட்டமான காலநிலை நிலவியதால், பனிப்பொழிவு குறைந்திருந்தது. பள்ளத்தாக்கு பகுதிகளில் மட்டும், லேசான பனிப்பொழிவு இருந்தது. இதில், ஆங்காங்கு தேயிலை மற்றும் காய்கறி தோட்டங்கள் கருகின.

கடந்த இரண்டு நாட்களாக, கடுமையான குளிர் நிலவுகிறது. அதிகப்பட்ச வெப்பநிலை, ஒரு டிகிரி செல்சியசாக தொடருகிறது. இந்நிலையில், ஊட்டி, குன்னுார், கோத்தகிரி மற்றும் குந்தா உள்ளிட்ட பகுதிகளில் கடுமையாக உறைபனி தாக்கியது.

ஆயிரக்கணக்கான ஏக்கர் பரப்பில் தேயிலை தோட்டங்கள் கருகி உள்ளன. குறிப்பாக, ஊட்டி வேலிவியூ பகுதியில் தேயிலை தோட்டங்கள் பாதிப்புக்குள்ளாகி உள்ளன. இதனால், பசுந்தேயிலை மகசூல் வெகுவாக குறைந்து விவசாயிகளுக்கு பல லட்சம் ரூபாய் இழப்பு ஏற்பட்டுள்ளது.

பனியில் கருகிய தோட்டங்களில், இலைகள் உதிர்ந்து, தேயிலை செடிகளில் குச்சிகள் மட்டுமே எஞ்சியுள்ளன. அரும்புகள் துளிர் விட்டு தோட்டங்கள் பழைய நிலைக்கு வரவேண்டும் எனில், இனிவரும் நாட்களில் மழை பெய்தாக வேண்டும். அதுவரை, பசுந்தேயிலை வரத்து இருக்காது என்பதால் விவசாயிகள் கவலை அடைந்துள்ளனர்.