தமிழகம் மற்றும் புதுவை பள்ளி மாணவர்கள், அமெரிக்காவின் விண்வெளி ஆய்வு மையமான 'நாசா' விற்கு நேரில் செல்லும் வாய்ப்பை வழங்கும் வகையில், 'தினமலர்' நாளிதழ் மாணவர் பதிப்பான 'பட்டம்' இதழ் சார்பில், மெகா வினாடி-வினா போட்டி கடந்த, 2018 முதல் நடத்தப்படுகிறது.

இந்த ஆண்டுக்கான போட்டி, இந்துஸ்தான் கல்வி குழுமத்துடன் இணைந்து, கோவை, திருப்பூர் மற்றும் நீலகிரி மாவட்டங்களை சேர்ந்த, 150 பள்ளிகளில் நடத்தப்படுகிறது. இப்போட்டிகளை, 'கோ-லோ' நிறுவனம் மற்றும் சத்யா ஏஜன்சி இணைந்து வழங்குகின்றன.

கோத்தகிரியில் கிரீன்வேலி மெட்ரிக் மேல்நிலைப்பள்ளியில் நடந்த தகுதி சுற்றுக்கான பொது அறிவு போட்டியில், 50 மாணவர்கள் பங்கேற்றனர். 16பேர் தேர்வு செய்யப்பட்டு, 8- அணிகளாக பிரிக்கப்பட்டனர். காலிறுதி சுற்றுக்கான வினாடி - வினா போட்டி,4- பிரிவுகளாக நடந்தது.

அதில், 'ஏ' அணியை சேர்ந்த, பிளஸ்-2 மாணவர்கள் நவீன், கார்த்திக் ஆகியோர் அரை இறுதி போட்டிக்கு முன்னேறினர். அவர்களுக்கு, பள்ளி அறங்காவலர் பிரசாந்த் கிருஷ்ணன், பள்ளி முதல்வர் கங்காதரன், உதவி முதல்வர் தேவகி, ஆசிரியைகள் ஷர்மிளா பிந்தியா, சாரதா, சீதா, நிஷா பானு மற்றும் மோனிஷா ஆகியோர் சான்றிதழ்கள் மற்றும் கேடயம், பதக்கங்களை வழங்கினர்.

பள்ளி அளவில் முதலிடம் பிடித்த மாணவர்களுக்கு, அரை இறுதி போட்டி நடத்தப்படும். மேலும், இம்மாதம் நடக்கும் இறுதி போட்டியில், முதல் பரிசு பெறும், இரு மாணவர் களுக்கு, அமெரிக்காவின் 'நாசா' விண்வெளி ஆய்வு மையத்தை காண வாய்ப்பு கிடைக்கும்.

இரண்டாம் இடம் பிடிக்கும், இரு மாணவர்களுக்கு, லேப்டாப், மூன்றாம் இடம் பிடிக்கும் இருவருக்கு 'டேப்லெட்' மற்றும் நான்காம் பரிசாக, பத்து மாணவர்களுக்கு 'ஸ்மார்ட் வாட்ச்' வழங்கப்படும். வெற்றி பெற்ற டாப், 25 அணிகளை சேர்ந்த, 50 மாணவர்களுக்கு ஆறுதல் பரிசும், சான்றிதழும் வழங்கப்படும்.

பள்ளி அறங்காவலர் பிரசாந்த் கிருஷ்ணன் கூறுகையில், ''மாணவர்களின் சிந்தனைத் திறன் 'தினமலர்' மாணவர் பதிப்பான பட்டம் இதழ் மூலம் மேம்படுகிறது. அறிவியல் சார்ந்த புதிய தகவல்களை மாணவர்களால் பதிய வைத்து கொள்ள முடிகிறது. மாணவர்களுக்கு இடையே, தமிழ் ஆர்வம் துாண்டப்படுகிறது. இந்த இதழ், அரிய தகவல்களை அடங்கி வருவதால், மாணவர்களுக்கு பெரிய அறிவு களஞ்சியமாக திகழ்கிறது. பட்டம் இதழை படிக்கும் மாணவர்கள் நிச்சயமாக சாதனை மாணவர்களாக இருப்பர் என்பதில் சந்தேகம் இல்லை. இந்த இதழ், மாணவர்கள் மட்டுமின்றி, ஆசிரியர்களுக்கும் பயனுள்ளதாக உள்ளது,'' என்றார்.