நீலகிரி மாவட்டம் ஊட்டி அரசு மருத்துவமனை அருகில் தேசிய நகர்ப்புற வாழ்வாதார இயக்க அலுவலகம் செயல்பட்டு வருகிறது. ஊட்டி நகராட்சி அலுவலகத்தில் சமுதாய ஒருங்கிணைப்பாளராக உள்ள யாமினி, என்பவர் இந்த அலுவலகத்தில் மகளிர் குழுவுக்கு கடன் வழங்கும் பிரிவில் பணியாற்றி வருகிறார். நீலகிரி மாவட்டத்திலுள்ள, 35 மகளிர் குழுக்களுக்கு கூட்டுறவுத்துறை உதவியுடன் தலா , 5 லட்சம் ரூபாய் கடன் வழங்க திட்டமிடப்பட்டு நேற்று மகளிர் குழுக்களுக்கு காசோலை மற்றும் பணம் வினியோகம் செய்யப்பட்டது.

இந்நிலையில், மகளிர் குழுக்களுக்கு பணம் வழங்கியதற்கு கைமாறாக ஒவ்வொரு குழுவிடம் இருந்து தலா, 42 ஆயிரம் ரூபாயை யாமினி மற்றும் அதே அலுவலகத்தில் தற்காலிக அடிப்படையில் பணியாற்றும் பிரேமலதா ஆகியோர் வசூலித்ததாக கூறப்படுகிறது. சுமார் 10 குழுக்களிடம் இருந்து இதுவரை, 4 லட்சம் ரூபாய் வசூலித்ததாக தெரிகிறது.

தகவலின் பேரில் ஊட்டி லஞ்ச ஒழிப்புத் துறை டி.எஸ்.பி., ஜெயக்குமார், எஸ்.ஐ., ரங்கநாதன் தலைமையிலான லஞ்ச ஒழிப்பு போலீசார் சம்பவ இடத்திற்கு சென்று திடீர் ஆய்வு நடத்தி கணக்கில் வராத, 4 லட்சம் ரூபாய் பணத்தை கைப்பற்றியுள்ளனர்.

மேலும், இதுகுறித்து யாமினி, பிரேமலதா ஆகியோரிடம் லஞ்ச ஒழிப்பு துறை போலீசார் வழக்கு பதிவு செய்து விசாரணை நடத்தி வருகின்றனர்.