குன்னுாரில், லஞ்சம் இல்லாத நீலகிரி அமைப்பு ஒருங்கிணைப்பாளர் மனோகரன்; மக்கள் சேவை மைய நிர்வாகிகள் சார்பில், மாநில முதல்வர்; மாவட்ட கலெக்டருக்கு அனுப்பியுள்ள மனு:

நீலகிரி மாவட்டத்தில், செயல்படுத்தாத நில உடமை மேம்பாட்டு திட்டத்தை, மாநில அரசு அமல்படுத்த வேண்டும்.

l அனைத்து உள்ளாட்சிகளிலும் பழங்குடியின மக்கள் மற்றும் பூர்வ குடிமக்கள் தாழ்த்தப்பட்ட பிற்படுத்தப்பட்ட மக்கள் வசிக்கும் நிலையில், கார்ப்பரேட் நிறுவனங்களின் வருவாயை கணக்கில் கொண்டு, பேரூராட்சிகளாக உள்ளதை மாற்றி ஊராட்சியாகவும்; ஊராட்சிகளை சிற்றுராட்சியாகவும் மாற்ற வேண்டும்.

l மாநிலத்தில், முதலில் பஸ்கள் நாட்டுடைமையாக்கப்பட்டு, நீலகிரியில், 450 அரசு பஸ்கள் இயங்கிய நிலையில், தற்போது 335 பஸ்கள் இயக்கப்படுகிறது. அதில், ஐகோர்ட் உத்தரவை மீறி பல பஸ்களில் வசூலிக்கும், 'எக்ஸ்பிரஸ்' கட்டணத்தை ரத்து செய்து, அரசு நிர்ணயம் செய்த கட்டணம் வசூலிக்க வேண்டும்.

l மாவட்டத்தில், 40 ஆயிரத்திற்கும் மேற்பட்ட மாணவர்கள் பயணம் மேற்கொள்ளும் நிலையில் கூடுதல் பஸ்கள் இயக்க வேண்டும்.

l மாவட்டத்தில் 110 மினி பஸ்கள் இயங்கும் நிலையில், 25 மினிபஸ் களுக்கு அனுமதி வழங்க அரசு திட்டமிட்டுள்ள நிலையில், கிராமங்களை இணைக்கும் வகையில் இயக்காமல் உள்ள மினி பஸ்களின் உரிமங்கள் ரத்து செய்ய வேண்டும்.

l தமிழகத்தில் ஆவின் பால் மற்றும் பால் பொருட்கள் ஒரே விலையில் விற்கப்படும் நிலையில், நீலகிரியில் மட்டும், 'டிலைட்' பால் 5 ரூபாய்; அரை லிட்டர் தயிர், 8 ரூபாய் கூடுதலாகவும், விற்கப்படுவதை தடுக்க வேண்டும்.

l தென்னகத்தின் நீர் தொட்டியாக உள்ள நீலகிரி மலையில் பசுமை பாலைவனமாக மாற காரணமாக, உள்ள யூகலிப்டஸ், பைன், அக்கேசசியா போன்ற அன்னிய மரங்களை அகற்றும் உத்தரவை முழுமையாக செயல்படுத்தி,இவற்றை கூட்டுறவு தொழிற்சாலைகளுக்கு எரிபொருளுக்காக வழங்க வேண்டும்.

l குன்னுாரில் அரசு கல்லுாரி அமைக்கும் முடிவை மாற்றி, தோட்டத் தொழிலாளர்கள் மற்றும் விவசாயிகளின் குழந்தைகளுக்கு பயனுள்ள வகையில், குந்தா பகுதியில் அரசு கல்லுாரி அமைக்க வேண்டும்.

l குன்னுார் மவுண்ட் ரோடு, அருவங்காடு உட்பட மாவட்டத்தின் பல்வேறு பகுதிகளிலும் பள்ளி, மருத்துவமனை, வழிபாட்டு தலங்கள் மற்றும் நெடுஞ்சாலை அருகே உள்ள மதுக்கடைகளை அகற்ற வேண்டும். இவ்வாறு அதில் கூறப்பட்டுள்ளது.