ராமேஸ்வரம் ராமநாதசுவாமி கோயிலில் நவராத்திரி விழா அக்.2ல் பர்வதவர்த்தினி அம்மனுக்கு காப்பு கட்டுதலுடன் துவங்கியது. அக்.3 முதல் 11 வரை பர்வதவர்த்தினி அம்மன் அன்னபூரணி, மகாலட்சுமி, சிவதுர்க்கை, சரஸ்வதி உள்ளிட்ட பல அவதாரத்தில் அலங்கரிக்கப்பட்டு பக்தர்களுக்கு அருள்பாலித்தார். நேற்று விஜயதசமியில் மாலை 5:30 மணிக்கு கோயிலில் இருந்து தங்க சிம்ம வாகனத்தில் பர்வதவர்த்தினி அம்மன், தங்க குதிரை வாகனத்தில் ராமநாதசுவாமி புறப்பாடாகி வன்னி நோன்பு திடலில் எழுந்தருளினர்.

இரவு 7:00 மணிக்கு அம்மன் அம்பு எய்து மகிஷாசூரனை வதம் செய்யும் நிகழ்ச்சியை கோயில் குருக்கள் உதயகுமார் நடத்தினார். பின் சுவாமி, அம்மனுக்கு மகா தீபாராதனை நடந்தது. இதில் ஏராளமானோர் சுவாமி தரிசனம் செய்தனர். இரவு 8:00 மணிக்கு சுவாமி, அம்மன் கோயிலுக்கு திரும்பினர்.