தமிழக பட்டதாரி ஆசிரியர் கூட்டணி மாநிலச் செயலாளர் முருகேசன் அறிக்கையில் கூறியிருப்பதாவது: மார்ச் 11 முதல் 10ம் வகுப்பு அரசு பொதுத்தேர்வு ராமநாதபுரம் மாவட்டத்தில் 70 க்கு மேற்பட்ட தேர்வு மையங்களில் நடக்கிறது. தேர்வுப்பணிக்கு ஆசிரியர்களை நியமனம் செய்யும் போது கர்ப்பிணிகள், மாற்றுத்திறனாளி ஆசிரியர்களுக்கு விலக்களிக்க வேண்டும். பஸ் வசதி இல்லாத தேர்வு மையங்களுக்கு பெண் ஆசிரியர்களை நியமனம் செய்யக் கூடாது.

ராமநாதபுரம், பரமக்குடி நகரிலுள்ள சில தனியார் பள்ளிகளிலுள்ள தேர்வு மையங்களில் சிலர் தன்னுடைய செல்வாக்கை பயன்படுத்தி பணி நியமன ஆணை பெறுவது தொடர் கதையாக உள்ளது. அதை தவிர்த்து பெண் ஆசிரியர்களுக்கு முன்னுரிமை வழங்க வேண்டும். தேர்வு பணி ஆசிரியர்கள் நியமனம் நேர்மையாகவும், நியாயமாகவும் நடத்திட முதன்மைக்கல்வி அலுவலர் நடவடிக்கை வேண்டும்.

இவ்வாறு கூறியுள்ளார்.