இந்தப் பிரிவு 52 வழித்தடம் மொத்த பாதை நீளம் 65 கி.மீ உள்ளடக்கியது.உச்சிபுளி, மண்டபத்தில் இரண்டு மாறுதல் நிலையங்கள் உள்ளது. இது விரைவில் தெற்கு ரயில்வேயின் முதன்மை தலைமை மின் பொறியாளரின் அங்கீகாரத்திற்காக சமர்ப்பிக்கப்பட உள்ளது.

மேலும் ஏசி லோகோ சோதனைகள் மற்றும் சோதனை ரயில் செயல்பாடுகளை எளிதாக்க, மேல்நிலை உபகரண அமைப்பில் 25 கே.வி., மின்சாரம் தொடர்ந்து பராமரிக்கப்படும். இந்த அமைப்பு 25,000 வோல்ட் உயர் மின்னழுத்தத்தைக் கொண்டுள்ளது.

பொதுமக்கள், பயணிகள் மற்றும் தொழிலாளர்கள் பின்வரும் பாதுகாப்பு முன்னெச்சரிக்கை நடவடிக்கைகளைப் பின்பற்ற வேண்டும்.

நேரடியாகவோ அல்லது மறைமுகமாகவோ மேல்நிலை கம்பிகள் அல்லது தொடர்புடைய உபகரணங்களைத் தொடாதீர்கள். குறைந்தபட்சம் 2 மீட்டர் துாரத்தைப் பராமரிக்கவும்.

மழை அல்லது மின்னலின் போது விரிக்கப்பட்ட குடைகளைப் பயன்படுத்துவதைத் தவிர்க்கவும். ரயில் இன்சின்கள், வண்டிகள் அல்லது வேகன்களில் ஒருபோதும் ஏற வேண்டாம்.

கூரையிலிருந்து செல்பி எடுப்பதால் பல மின்சாரம் பாய்ந்த சம்பவங்கள் நடந்துள்ளன. மேம்பாலங்கள் அல்லது நடைபாதை மேம்பாலங்களில் இருந்து மின்சார பாதைகளில் பொருட்களை வீச வேண்டாம். ரயில்வே அனுமதியின்றி மேல்நிலை உபகரணங்கள் அருகே மரங்களை வெட்டவோ அல்லது கத்தரிக்கவோ கூடாது.

வாகனங்களின் மேல்பகுதியில் பயணிக்க வேண்டாம் மற்றும் சரக்கு வாகனங்கள் அதிக சுமை ஏற்றுவதைத் தவிர்க்கவும். வாகனங்களுக்கு அதிகபட்சமாக அனுமதிக்கப்பட்ட உயரத்தைக் குறிக்க, லெவல் கிராசிங்குகளுக்கு முன் உயர அளவீடுகள் வழங்கப்பட்டுள்ளன. இதனால் அசம்பாவித சம்பவங்கள் தவிர்க்கப்படும்.

கீழே செல்லும் போது அனுமதிக்கப்பட்ட உயரத்திற்கு மேல் உலோகக் கொடிக்கம்பங்கள் அல்லது பிற உயரமான பொருட்களை எடுத்துச் செல்வது ஆபத்தானது என தெற்கு ரயில்வே நிர்வாகம் தெரிவித்துள்ளது.