கேரளா, ஆலப்புழாவை சேர்ந்தவர் ஸ்ரீஜித், 51. உறவினர்கள், 15 பேருடன் நேற்று முன்தினம் ராமேஸ்வரம் ராமநாதசுவாமி கோவிலில் தரிசனம் செய்துள்ளார்.

ராமேஸ்வரத்தில் இருந்து கன்னியாகுமரிக்கு அரசு பஸ்சில் ஆன்லைனில் முன்பதிவு செய்து, அதற்கான கட்டணமும் செலுத்தியுள்ளார். காலை, 7:15க்கு புறப்படும் இந்த பஸ்சில் செல்ல, ஸ்ரீஜித், குடும்பத்தினருடன் பஸ் ஸ்டாண்ட் வந்தார்.

பஸ் வராததால், அங்கிருந்த ஊழியரிடம் விசாரித்தபோது, காலை, 6:00 மணிக்கு பின், 9:45 மணிக்கு தான் பஸ் உள்ளது என, கூறினர். அதிர்ச்சியடைந்த கேரள பயணியர், ராமநாதபுரம் மாவட்ட பா.ஜ., தலைவர் முரளிதரனிடம் நடந்த சம்பவத்தை கூறினர்.

பின், போக்குவரத்து உயர் அதிகாரியிடம் புகார் செய்த நிலையில், மூன்று ஆண்டுகளுக்கு முன்பே, காலை, 7:15க்கு கன்னியாகுமரி செல்லும் பஸ் ரத்து செய்யப்பட்டது தெரிய வந்தது.

ஆனால், ஆன்லைனில் முடக்காததால், முன்பதிவு ஆகியுள்ளது எனவும், அதற்கு பதிலாக, காலை, 9:45 மணிக்கு புறப்படும் பஸ்சில் செல்லலாம் என, அதிகாரிகள் மழுப்பலாக தெரிவித்தனர்.

முரளிதரன் கூறுகையில், ''இல்லாத பஸ்சிற்கு முன்பதிவு செய்து பணம் வசூலித்தது, தமிழக அரசின் நிர்வாக சீர்கேட்டை காட்டுகிறது. பாதிக்கப்பட்ட கேரள பயணியரிடம் தமிழக அரசு மன்னிப்பு கேட்க வேண்டும்,'' என்றார்.