தொண்டி, எஸ்.பி.பட்டினம், நம்புதாளை, சோலியக்குடி, புதுப்பட்டினம், முள்ளிமுனை, காரங்காடு உள்ளிட்ட பல்வேறு கடலோர கிராமங்களில் வசிக்கும் மீனவர்கள் கடலுக்கு சென்று மீன்பிடிப்பதை வாழ்வாதார தொழிலாக கொண்டுள்ளனர்.

மீனவர்களின் நலன் கருதி அவர்களுக்கு மானிய விலையில் லைப் ஜாக்கெட் வழங்கும் பணிகள் நடக்கிறது. நேற்று முன்தினம் தொண்டி அருகே சோலியக்குடியில் மீனவர்களுக்கான கூட்டம் நடந்தது. மீன்துறை ஆய்வாளர் அபுதாகிர், கடல் அமலாக்க பிரிவு எஸ்.ஐ., குருநாதன், மீன்வள மேற்பார்வையாளர் முருகேசன், சாகர்மித்ரா இந்திரஜித் மற்றும் பலர் கலந்து கொண்டனர்.

படகு கவிழ்ந்து தவறி கடலில் விழுந்து மீனவர்கள் உயிரிழக்கும் சம்பவங்களை தவிர்க்க படகில் செல்லும் அனைவரும் கட்டாயம் லைப்ஜாக்கெட் அணிய வேண்டும். 75 சதவீதம் மானியத்தில் ரூ.618க்கு ஒரு லைப் ஜாக்கெட் வழங்கப்படுகிறது. மீனவர்கள் வாங்கி பயன்பெற வேண்டும்.

மேலும் ஆமைகள் அடிக்கடி கடற்கரை பகுதிக்கு வருவது வழக்கமாக உள்ளது. வனவிலங்கு பாதுகாப்பு சட்டத்தின் கீழ் ஆமையை பிடிக்க கூடாது என்பதால் உயிருடன் மீட்டு கடலில் விட்டுவிட வேண்டும் என்று அலுவலர்கள் பேசினர்.