ராமநாதபுரம் புதிய பஸ் ஸ்டாண்ட் ரூ.20 கோடியில் விரிவாக்கம் செய்யப்பட்டு 99 கடைகள் அமைக்கப்பட்டுள்ளன. இந்த கடைகளில் 14 கடைகளை தவிர்த்து 85 கடைகளுக்கு இன்று (ஜூலை 17ல் ) பொது ஏலம் நடக்கிறது. இதற்காக ஜூன் 30ல் அறிவிப்பு வெளியிடப்பட்டுள்ளது.

இருப்பினும் கடைக்கான ஏலத்தில் பங்கேற்க டி.டி.,யுடன் வரும் விண்ணப்பதாரர்களை நகராட்சி நிர்வாகம் அலைகழித்து வருகிறது. இந்நிலையில் டி.டி., வழங்க கடைசி நாளான நேற்று மதியம் 3:00 மணி வரை ஏராளமான வியாபாரிகள் காத்துஇருந்தனர். ஆனால் அதனை வாங்க நகராட்சியில் ஆளில்லை.

ஏலத்தில் பங்கேற்க டி.டி.,யுடன் விண்ணப்பிக்க 3 நாட்களாக வருகிறோம். ஆனால் கமிஷனர்,மேலாளர் இருப்பது இல்லை. அவர்கள் வெளியே சென்றுள்ளதாக கூறுகின்றனர். அவர்களுக்கு பதிலாக மாற்று நபர்களையும் நியமிக்கவில்லை.

அலுவலகத்தில் (நேற்றும்) ஆளின்றி வியாபாரிகள் ஏமாற்றத்துடன் திரும்பிச் சென்றனர். கமிஷனர், மேலாளர் நீதிமன்றத்திற்கு சென்றுள்ளதாக அலுவலர்கள் தெரிவித்தனர்.