கூட்டத்தில் கலெக்டர் பிருந்தாதேவி பேசியதாவது: ஆசிரியர் தேர்வு வாரியத்தால், முதுகலை ஆசிரியர்களுக்கான தேர்வு வரும், 12ல் நடைபெற உள்ளது. சேலம் மாவட்டத்தில், 38 மையங்களில், 668 அறைகளில் தேர்வு நடைபெறுகிறது. மாவட்டத்தில், 13,113 தேர்வர்கள் தேர்வு எழுத உள்ளனர்.

இவர்களில், 187 மாற்றுத்திறனாளிகள், சொல்வதை எழுதுபவர் துணையுடன், 35 பேர் தேர்வை எழுதுகின்றனர். தேர்வு எழுதும் பணி நாடுனர்களுக்கான அறிவுரைகள், அவர்களுக்கான அனுமதி சீட்டில் வழங்கப்பட்டுள்ளது. காலை, 9:30 மணிக்கு மேல் வருகை புரியும் தேர்வர்கள் அனுமிக்கப்பட மாட்டார்கள்.

தேர்வை கண்காணிக்க, 38 முதன்மை கண்காணிப்பாளர்கள், 38 துறை அலுவலர்கள், 668 அறை கண்காணிப்பாளர்கள் நியமிக்கப்பட்டுள்ளனர். ஆசிரியர் தேர்வு வாரியத்தால் நடத்தப்படுகின்ற முதுகலை ஆசிரியர்களுக்கான தேர்வை நேர்மையாகவும், விதிமுறைகளுக்கு உட்பட்டு நடத்திட அனைத்து நடவடிக்கைகளும் மாவட்ட நிர்வாகத்தால் மேற்கொள்ளப்பட்டுள்ளது.

இவ்வாறு பேசினார்.

முதன்மை கல்வி அலுவலர் கபீர், மாவட்ட கல்வி அலுவலர் மான்விழி, ஆதி திராவிட நல அலுவலர் ஜெயகுமார் உள்ளிட்ட பலர் கலந்து கொண்டனர்.