சேலம் மாவட்டம், மேச்சேரியில் பிரசித்தி பெற்ற பத்ரகாளியம்மன் கோவில் உள்ளது. ஒவ்வொரு மாதமும், அமாவாசைக்கு பத்ரகாளியம்மனுக்கு சிறப்பு அலங்காரம் செய்யப்படும். அதன்படி ஐப்பசி அமாவாசையை முன்னிட்டு, நேற்று பத்ரகாளியம்மனுக்கு கோல்கட்டா காளி அலங்காரம் செய்யப்பட்டது. நேற்று காலை, 10:00 மணி முதல் கோவிலுக்கு பக்தர்கள் வரத்துவங்கினர். பத்ரகாளியம்மனை, பக்தர்கள் பரவசத்துடன் தரிசனம் செய்தனர்.மேட்டூர் அணை முனியப்பன் கோவிலில், அமாவாசையை முன்னிட்டு ஏராளமான பக்தர்கள் வரிசையில் நின்று தரிசனம் செய்தனர். மேட்டூர் அணை பூங்கா அருகே, மேட்டூர்-கொளத்துார் நெடுஞ்சாலையில் கார், வேன் உள்ளிட்ட வாகனங்களை பக்தர்கள் சாலையின் இருபுறமும் நிறுத்தியதால் போக்குவரத்து நெரிசல் ஏற்பட்டது.

கர்நாடகா மாநிலம், ஸ்ரீமலை மாதேஸ்வரன் சுவாமி கோவிலுக்கு செல்லும் பக்தர்கள் வசதிக்காக நேற்று, சேலம், மேட்டூரில் இருந்து சிறப்பு பஸ்கள் இயக்கப்பட்டன.