ADDED : ஜன 02, 2024 12:14 PM
மேட்டூர்: மேட்டூர் அணை நீர் திறப்பு நேற்று காலை வினாடிக்கு, 600 கனஅடியாக அதிகரிக்கப்பட்டது.
மேட்டூர் அணை மொத்த நீர்மட்டம், 120 அடி. காவிரி நீர்
பிடிப்பு பகுதியில் மழை தீவிரம் அடைந்ததால் நேற்று முன்தினம் வினாடிக்கு, 600 கனஅடியாக இருந்த நீர்வரத்து நேற்று, 807 கனஅடியாக சற்று அதிகரித்தது.
அணையில் இருந்து டெல்டா பாசனத்துக்கு திறக்கப்பட்ட வினாடிக்கு, 500 கனஅடி நீர் கடந்த நவ., 8ல், நிறுத்தப்பட்டு காவிரி கரையோர குடிநீர் தேவைக்காக வினாடிக்கு, 250 கனஅடி நீர் திறக்கப்பட்டது.
இந்நிலையில், 55 நாட்களுக்கு பின்பு குடிநீருக்கான நீர் திறப்பு நேற்று காலை, 8:00 மணி முதல் வினாடிக்கு, 600 கனஅடியாக அதிகரிக்கப்பட்டது.
இந்த நீர், அணை மின் நிலையம் மூலம் காவிரியில் வெளியேற்றப்பட்டது. இதனால் அணை மின் நிலையத்தில், 55 நாட்களுக்கு பின்பு நேற்று மின் உற்பத்தி துவங்கியது. வினாடிக்கு, 5,000 கனஅடி நீர் திறக்கும் பட்சத்தில் அணை மின் நிலையத்தில், 50 மெகாவாட் மின்சாரம் உற்பத்தி செய்யலாம்.
நேற்று, 600 கனஅடி நீர் திறந்ததால் அணை மின் நிலையத்தில், 5 முதல், 7 மெகாவாட் மின்சாரம் உற்பத்தி செய்யப்பட்டது.
நேற்று அணை நீர்மட்டம், 71.27 அடியாகவும், நீர் இருப்பு, 33.80 டி.எம்.சி.,யாகவும் இருந்தது.
