தாராபுரத்தில் தனியார் பள்ளி கட்டடம் இடிப்பு விவகாரத்தால், இரண்டாவது நாளாக நேற்றும் பதற்றம் நிலவியது.

தாராபுரத்தில் உள்ள தேன்மலர் மெட்ரிக் பள்ளியில், விதிமுறைகளுக்கு முரணாக கட்டப்பட்ட கட்டடத்தை இடிக்க, ஓராண்டுக்கு முன் உயர் நீதிமன்றம் உத்தரவிட்டது. இது தொடர்பாக இருமுறை அவகாசம் தந்தும், மாணவர்களின் பெற்றோர்களுக்கு தெரிவிக்காமல், பள்ளி நிர்வாகம் மறைத்து விட்டது. இது தொடர்பாக நேற்று முன்தினம் தகவல் பரவியது. இதையறிந்த நுாற்றுக்கும் மேற்பட்ட பெற்றோர்கள், பள்ளி முன் திரண்டனர். பள்ளி நிர்வாகம், பேச்சுவார்த்தைக்கு வந்த கல்வி அலுவலரை முற்றுகையிட்டு கடும் வாக்குவாதம் செய்தனர். இந்நிலையில் திருப்பூர் மாவட்ட முதன்மை கல்வி அலுவலர் புனித அந்தோணியம்மாள் தலைமையில், பள்ளி நிர்வாகம் மற்றும் பெற்றோர்கள் பங்கேற்ற பேச்சுவார்த்தை நேற்று காலை, 11:00 மணியளவில் நடந்தது. இதில் பத்தாம் வகுப்பு மற்றும் பிளஸ் 2 மாணவர்களுக்கு, அருகில் உள்ள வேறு பள்ளி கட்டடத்தில், தற்போது பாடம் நடத்தும் அதே ஆசிரியர்களைக் கொண்டு, பாடம் நடத்த ஏற்பாடு செய்வதாக கூறினர். இதற்கு பெற்றோர்கள் பலரும், ஒரே நேரத்தில் தங்களது கருத்துக்களை முன் வைத்ததால் களேபரம் ஏற்பட்டது.

இதனால் 'கலெக்டரிடம் பேச்சுவார்த்தை நடத்தலாம். உங்களில் சிலர் வாருங்கள்' என்று, மாவட்ட முதன்மை கல்வி அலுவலர் கூறினார். பெற்றோர் தரப்பிலோ கலெக்டரை இங்கு வர சொல்லுங்கள் எனக் கூறினர். இதனால் அதிகாரிகள் சென்று விட்டனர். இதை தொடர்ந்து அங்கிருந்து வெளியேறிய பெற்றோர்கள், தாராபுரம் பஸ் ஸ்டாண்ட் அருகில் சாலையில் அமர்ந்து போராட்டத்தில் ஈடுபட்டனர். மற்றொரு குழுவினர் பைபாஸ் சாலை மேம்பாலம் அருகே அமர்ந்து இருபுற சாலைகளையும் அடைத்து மறியலில் ஈடுபட்டதால், நான்கு வழி சாலையில் போக்குவரத்து கடுமையாக பாதிக்கப்பட்டது. இதனால் தாராபுரம் ஆர்.டி.ஓ., பெலிக்ஸ் ராஜா, கலெக்டரிடம் கூறி, மாணவர்கள் படிப்புக்கு உரிய ஏற்பாடு செய்வதாக கூறவே, மறியலில் ஈடுபட்டவர்கள் கலைந்து சென்றனர்.

காலை, 11:30 மணிக்கு பள்ளியில் பேச்சுவார்த்தை தொடங்கி, 1:15 மணி வரை நீடித்தது. தோல்வியில் முடிந்ததால், 1:30 மணிக்கு இரு இடங்களில் தொடங்கிய சாலை மறியல், 4:15 மணி வரை நடந்தது. இதனால் தாராபுரம் நகர பகுதியில் பதற்றத்தில் மூழ்கியது.

டி.எஸ்.பி., மிரட்டியதால் போராட்டம் அறிவிப்பு

பள்ளி கட்டடத்தை இடிப்பதால், குழந்தைகளின் படிப்பு பாதிக்கும் எனக்கூறி, தாராபுரத்தில் நேற்று முன்தினம் பெற்றோர்கள் போராட்டத்தில் ஈடுபட்டனர். ஒரு கட்டத்தில் சாலை மறியல் செய்யப்போவதாக பேச்சு எழுந்தது. அப்போது அங்கிருந்த டி.எஸ்.பி. சுரேஷ்குமார், அங்கிருந்தவர்களை ஒருமையில் பேசியதாக குற்றச்சாட்டு எழுந்துள்ளது. இதுகுறித்து தமிழ்நாடு அரசு ஊழியர் சங்கம் வெளியிட்டுள்ள அறிக்கை:

போராட்டத்தில் பங்கேற்ற பெண்களை, தாராபுரம் டி.எஸ்.பி., சுரேஷ்குமார் ஒருமையில் பேசியுள்ளார். அங்கிருந்த எங்கள் சங்கத்தின் மாநில பொருளாளர் ஈஸ்வரமூர்த்தி இதை சுட்டிக் காட்டியபோது, பெற்றோர்களுடன் உன்னையும் சேர்த்து கைது செய்வேன் எனக்கூறி மிரட்டியுள்ளார். அவர் மீது உயர் அதிகாரிகள் உரிய நடவடிக்கை எடுக்க வேண்டும். இவ்வாறு அறிக்கையில் தெரிவிக்கப்பட்டுள்ளது.

மேலும் டி.எஸ்.பி.,யை கண்டித்து டிச., 2ல் நெடுஞ்சாலைத்துறை கோட்ட பொறியாளர் அலுவலகம் முன் ஆர்ப்பாட்டம் நடத்தப்படும் என்று, தமிழ்நாடு நெடுஞ்சாலை துறை சாலை பராமரிப்பு ஊழியர் சங்கம் அறிவித்துள்ளது.