மதுரையில் இருந்து பரமக்குடி வரை நான்கு வழிச்சாலை அமைக்கப்பட்டு வாகன போக்குவரத்து நடந்து வருகிறது. தினசரி மதுரையில் இருந்து ஆயிரக்கணக்கான வாகனங்கள் நான்கு வழிச்சாலையை கடந்து செல்கின்றன. பரமக்குடி, ராமநாதபுரம், ராமேஸ்வரம், ஏர்வாடி, கமுதி உள்ளிட்ட பல்வேறு நகரங்களுக்கு தினசரி காய்கறி, பழங்கள், பர்னிச்சர் பொருட்கள், பலசரக்கு பொருட்களை ஏற்றிய கனரக வாகனங்கள் சென்று வந்த வண்ணம் உள்ளன.

கனரக வாகன டிரைவர்கள் நள்ளிரவில் சரக்கு ஏற்றி திரும்புவதால் சர்வீஸ் ரோட்டில் உள்ள கழிப்பிடத்தை பயன்படுத்துவது வழக்கம்.

கடந்த சில மாதங்களாக கழிப்பறையை பூட்டி வைத்துள்ளனர். திருப்பாச்சேத்தி டோல்கேட்டை அடுத்து உள்ள கழிப்பறைகள் பலவும் பூட்டி கிடக்கின்றன. மேலும் சர்வீஸ் ரோட்டில் உள்ள மின் விளக்குகளும் எரிவதில்லை.

மின்கட்டணம் செலுத்தாததால் மின் இணைப்பு துண்டிக்கப்பட்டதாக கூறப்படுகிறது. ஆண்டுதோறும் டோல்கேட கட்டணம் உயர்த்தப்பட்டு வரும் நிலையில் கழிப்பிடங்கள் பயன்படுத்த முடியாத நிலையில் இருப்பதும், தெருவிளக்குகள் எரியாமல் இருப்பது டிரைவர்களை அதிருப்திக்கு உள்ளாக்கியுள்ளது.