திருப்பூர் மாவட்டம் காங்கேயத்தில் இருந்து காரைக்குடி நோக்கி (டி.என்.,39 என் 0198) அரசு பஸ் சென்றது. எதிர் திசையில் காரைக்குடியில் இருந்து திண்டுக்கல் நோக்கி (டி.என்.,63 என் 1776) அரசு பஸ் வந்தது. இரண்டு பஸ்களும் நேற்று மாலை 5:00 மணியளவில் சிவகங்கை மாவட்டம் திருப்புத்துார் அருகே கும்மங்குடி சமத்துவபுரம் அருகே நேருக்கு நேர் மோதிக் கொண்டன.

11 பேர் பரிதாப பலி :

இதில் இரண்டு பஸ்களும் பலத்த சேதமடைந்தன. இந்த கொடூர விபத்தில் பஸ்களின் இடிபாடுகளில் சிக்கி ஒரு பஸ்சின் டிரைவர், 9 பெண்கள் உட்பட 11 பேர் சம்பவ இடத்திலேயே பரிதாபமாக பலியாயினர்.

தகவல் அறிந்து மாவட்ட கலெக்டர் பொற்கொடி, எஸ்.பி., சிவபிரசாத், தாசில்தார் மாணிக்கவாசகம், டி.எஸ்.பி., செல்வக்குமார் மற்றும் போலீசார் விரைந்து மீட்பு பணிகளை மேற்கொண்டனர். பஸ்சில் பயணித்த பெண் செல்லம் 55, உள்ளிட்ட 9 பெண்கள் பலியாயினர்.

இரவு வரை மீட்பு பணி :

இரண்டு பஸ்களிலும் பயணித்த மேலும் 40 பேர் படுகாயமுற்று சிவகங்கை, திருப்புத்துார், காரைக்குடி அரசு மருத்துவமனைகளில் சிகிச்சை பெற்று வருகின்றனர். திருப்புத்துார் அரசு மருத்துவமனையில் போதிய டாக்டர், நர்ஸ்கள் இல்லாததால் அங்குள்ள தனியார் மருத்துவமனை டாக்டர், நர்ஸ்கள் முதலுதவி சிகிச்சை அளித்து, காயமுற்ற பயணிகளை அரசு மருத்துவமனைகளுக்கு அனுப்பி வைத்தனர். நேற்றிரவு வரை மீட்பு பணிகள் தொடர்ந்து நடந்தன. இந்த விபத்து குறித்து நாச்சியாபுரம் போலீசார் விசாரித்து வருகின்றனர்.

பெண் டாக்டர் மயக்கம் :

சிவகங்கை அரசு மருத்துவமனையில் காயமடைந்த பயணிகளுக்கு சிகிச்சை அளித்த போது பயிற்சி பெண் டாக்டர் ஒருவர் மயங்கி விழுந்தார்.