மதகுபட்டி போலீஸ் ஸ்டேஷன் எல்லைக்குட்பட்ட காளையார்மங்கலம் கிராமத்தில் கடந்த 19ம் தேதி அதிகாலை 4:00 மணிக்கு 4 பேர் கொண்ட கொள்ளையர்கள் முருகப்பன் வீட்டில் புகுந்து உள்ளே இருந்த தாயும் மகனையும் கட்டிப்போட்டு 4.5 பவுன் தங்கம், அலைபேசி மற்றும் ரூ.2 ஆயிரத்தை பறித்துச் சென்றனர். முருகப்பன் மதகுபட்டி போலீசில் புகார் அளித்தார்.

டி.எஸ்.பி., அமலஅட்வின் தலைமையில் இன்ஸ்பெக்டர்கள் சரவணபோஸ், இளையராஜா, எஸ்.ஐ.,க்கள் வைரமணி, சக்திவேல், கார்த்திகேயன் உள்ளிட்ட போலீசார் அடங்கிய தனிப்படையை எஸ்.பி., சிவபிரசாத் அமைத்தார்.

தனிப்படை போலீசார் தொழில்நுட்ப உதவியுடன் சிவகங்கை தி.புதுார் முத்துப்பாண்டி மகன் சரண்ராஜை 33 அடையாளம் கண்டு கைது செய்தனர்.

அவரின் வாக்குமூலத்தின் பேரில் அவரது சகோதரர் மதன்ராஜ் 20, நேரு பஜார் ஈஸ்வரன் மகன் லல்லுபிரசாத் 18, அம்பேத்கர் தெரு சின்னத்தம்பி மகன் கார்த்தி 28, கீரனுார் ராணி மகன் அஜித் 20, வேலாங்குளம் செல்வராஜ் மகன் சிவபாலன் 19, சூரக்குளம் ரோடு அங்குசாமி மகன் சந்தனமுத்து 50, உள்ளிட்ட 7 பேரை கைது செய்தனர்.

இவர்கள் மதகுபட்டி, காளையார்கோவில், சிவகங்கை தாலுகா போலீஸ் ஸ்டேஷன் எல்லைக்குள் நடந்த 10 திருட்டு வழக்குகளில் ஈடுபட்டிருந்தது விசாரணையில் தெரிய வந்தது.

அவர்களிடம் இருந்து 28.6 கிராம் தங்கம், 500 கிராம் வெள்ளி, 300 கிலோ பித்தளைப் பொருட்கள், லேப்டாப், மியூசிக் கீபோர்ட், 4 ஸ்பீக்கர்கள், 2 ஆம்ப்ளிபையர்கள், கார் மற்றும் டூவீலர்களை பறிமுதல் செய்தனர்.