தமிழகத்தில் கோடை வெயிலின் தாக்கம் நாளுக்கு நாள் அதிகரித்த வண்ணம் உள்ளது. பொதுமக்கள் வெயிலின் தாக்கத்தை தணிக்க பழச்சாறு, இளநீர், சர்பத் உள்ளிட்டவற்றை வாங்கி அருந்தி வருகின்றனர்.

வெயில் காலத்தில் எலுமிச்சம்பழ சாறு அருந்தினால் வெப்பம் தணியும். மேலும் சர்பத் தயாரிக்க எலுமிச்சம்பழம் தேவை, மதுரை மார்க்கெட்டிற்கு பேரையூர் மற்றும் தென்காசி மாவட்டத்தில் இருந்து எலுமிச்சம்பழம் விற்பனைக்கு கொண்டு வரப்படுகிறது.

தேவை அதிகரித்துள்ளதாலும் வரத்து குறைந்ததாலும் விலை அதிகரித்துஉள்ளது. 40 கிலோ எடை கொண்ட ஒரு மூடை பழம் நான்காயிரம் ரூபாயில் இருந்து ஏழாயிரம் ரூபாயாக உயர்ந்துள்ளது. எலுமிச்சம்பழத்தின் குறைந்த பட்ச விலையே 10 ரூபாயில் தொடங்குகிறது. பெரிய பழம் 13 ரூபாய்க்கு விற்பனை செய்யப்படுகிறது.

எலுமிச்சம்பழத்தின் விலை அதிகரித்ததை தொடர்ந்து சர்பத்தின் விலையும் 25 ரூபாயில் இருந்து 35 ரூபாயாக உயர்ந்துள்ளது. நடுத்தர மக்களுக்கு இந்த விலை உயர்வு கடுமையாக பாதித்துள்ளது.

ஆப்பிள், மாதுளை உள்ளிட்ட பழச்சாறுகளின் விலை 70 ரூபாயில் தொடங்கி 100 ரூபாய் வரை விற்பனை செய்யப்படுகிறது.