இந்நிலையில் திருப்புத்துாரில் திருவிழாக்கள், அரசியல் நிகழ்ச்சிகள், மருதுபாண்டியர் குருபூஜை போன்ற நிகழ்வுகளின் போது திருப்புத்துார் நகருக்குள் முன்னறிவிப்பின்றி போக்குவரத்து மாற்றம் செய்யப்படுகிறது. அப்போது பஸ்சில் வரும் பயணிகள் நகரின் எல்லைப்பகுதிகளில் இறக்கி விடப்படுகின்றனர். இதனால் பயணிகள் அலைக்கழிக்கப்படுகின்றனர். வெளியூர்களிலிருந்து வரும் பயணிகள் திருப்புத்துார் பஸ் ஸ்டாண்டில் இறங்கி தொலைதுார நகர்களுக்கு செல்ல பஸ் மாற முடியவில்லை.

ஆட்டோ,கார் போன்ற வாகனங்களில் ஏறி மற்றொரு பகுதிக்கு வந்து பஸ் ஏற வேண்டியுள்ளது. இதனால் குறித்த நேரத்தில் பயணத்தை தொடர முடியாமல் பயணிகள் பாதிக்கப்படுகின்றனர். கூடுதலாக பணம், நேரம் செலவழிக்க வேண்டிய நிலைக்கு தள்ளப்படுகின்றனர். குறிப்பாக மருத்துவ சிகிச்சைக்கு வருவோர் கடுமையாக பாதிக்கப்படுகின்றனர்.

வக்கீல் ராஜ்மோகன் கூறுகையில், போக்குவரத்து மாற்றம் நடைமுறைப்படுத்தும் போது பயணிகள் அலைவதைத் தவிர்க்க உள்ளாட்சி நிர்வாகங்கள்,போக்குவரத்து அலுவலர்கள் இணைந்து தற்காலிக பஸ் ஸ்டாண்ட் செயல்படுத்த வேண்டும். முன்பு சீரணி அரங்கம் பகுதி அவ்வாறு பயன்படுத்தப்பட்டுள்ளது. அது போல தம்பிபட்டி மைதானம், சிவகங்கை ரோட்டில் கண்மாய் பகுதி போன்ற இடங்களையும் ஆய்வு செய்யலாம். நேரடியாக புறவழிச்சாலைக்கு செல்ல இந்த இடங்களில் வசதி உள்ளது. இதனால் அனைத்து வழிகளிலிருந்தும் பஸ்கள் எளிதாக வந்து செல்ல முடியும்' என்றார்.

பஸ்கள் பல இடங்களில் நிறுத்தப்படுவதைத் தவிர்க்க முன்னெச்சரிக்கை நடவடிக்கையாக மாற்று ஏற்பாடுகளை அரசு போக்குவரத்துக்கழகம் மற்றும் போலீசார் மேற்கொள்ள வேண்டுமென பொதுமக்கள் எதிர்பார்க்கின்றனர்.

முக்கிய நிகழ்ச்சிகளுக்காக போக்குவரத்து மாற்றத்தின் போது அனைத்து வழித்தடங்களிலிருந்தும் வரும் பஸ்கள் ஒரே இடத்தில் நிறுத்த நடவடிக்கை எடுக்க வேண்டும். அதற்கான வசதியான இடத்தை தேர்வு செய்து தற்காலிக பஸ்ஸ்டாண்ட் செயல் படுத்த வேண்டும்.