தேனி: பெத்தாட்சி விநாயகர் கோயிலில் அதிகாலை 4:00 மணியில் இருந்து மாலை அணிந்து, விரதம் துவங்க பக்தர்கள் வருகை தந்தனர். துளசி மாலைகளை கோயில் குருக்கள் பக்தர்களுக்கு அணிவித்தனர். என்.ஆர்.டி., நகர் சிவ கணேச கந்த பெருமாள் கோயில், மதுரை ரோடு மீனாட்சி சுந்தரேஸ்வரர் கோயில், பெரியகுளம் ரோடு வெற்றி கொம்பன் விநாயகர் கோயில், அல்லிநகரம் வீரப்ப அய்யனார் மலைக்கோயில் உள்ளிட்ட கோயில்களில் பக்தர்கள் மாலை அணிந்து விரதம் துவங்கினர்.

பெரியகுளம்: பாலசுப்பிரமணியர் கோயிலில் அருகே வராகநதியில் ஐயப்ப பக்தர்கள் நீராடி, ஐஸ்வர்ய விநாயகர் கோயில் முன்பு மாலை அணிந்து விரதம் துவங்கினர். பெரியகுளம் பாலசாஸ்தா கோயிலில் பக்தர்கள் மாலை அணிந்தனர். 48 நாள் மண்டல பூஜை துவக்க நாளை முன்னிட்டு ஐயப்பனுக்கு நெய் அபிஷேகம் நடந்தது. ஏராளமான பக்தர்கள் பங்கேற்றனர். அர்ச்சகர் பிரசன்னா பூஜைகள் செய்தார். பிரசாதம் வழங்கப்பட்டது. தேவதானப்பட்டி மூங்கிலணை காமாட்சியம்மன் கோயில் மஞ்சளாற்றில் நீராடி ஏராளமான ஐயப்ப பக்தர்கள் மாலை அணிந்தனர். முதன் முதலாக கோயிலுக்கு செல்லும் கன்னிசாமிகள் அதிகளவில் மாலை அணிந்தனர்.