மாவட்ட வன அலுவலகத்தில் வன அலுவலர் அருண்குமார் தலைமையில் விவசாயிகள் குறைதீர் கூட்டம் நடந்தது. உதவி வன பாதுகாவலர் சிசில்கில்பர்ட், கலெக்டரின் நேர்முக உதவியாளர் வளர்மதி, மின்வாரிய செயற்பொறியாளர் சண்முகா, விவசாயிகள் பங்கேற்றனர்.

சீனிராஜ்: வருஷநாடு காமராஜபுரம் முதல் கிழவன்கோவில் வரை உள்ள 3.5 கி.மீ., வனத்துறை இடத்தில் ரோடு சீரமைக்கவும், வாகனம் செல்ல அனுமதி வழங்கினால் 80 கி.மீ., சுற்றி விருதுநகர் செல்ல வேண்டிய நிலை வராது.

உதவி வன பாதுகாவலர்: உயரதிகாரிகளிடம் ஆலோசித்து நடவடிக்கை எடுக்கப்படும்.

கண்ணன், விவசாயிகள் சங்க மாவட்டச் செயலாளர்: சாக்கலுாத்து மெட்டு ரோடு அமைப்பது குறித்து முன்னாள் எம்.எல்.ஏ., பாலபாரதி, எம்.பி., தங்கதமிழ்செல்வன் ஆய்வு செய்து மனுவும் வழங்கப்பட்டது. தேர்தல் வரும்போதெல்லாம் கட்சிகள் வாக்குறுதி தெரிவிக்கும் நிலையே உள்ளது.

கலெக்டரின் நேர்முக உதவியாளர்: பொதுப்பணித் துறையின் மூலம் தொடர் பாலம் அமைக்கும் பணிகள் மட்டுமே நடக்க திட்டமிடப்பட்டுள்ளதாக கலெக்டர் தலைமையில் நடந்த கூட்டத்தில் தெரிவிக்கப்பட்டது.

உதவி வன பாதுகாவலர்: சாக்கலுாத்து பாதையில் உயர் தொடர் பாலம் அமைக்க ஒப்புதல் பெற்று தருவதாக எம்.பி., தெரிவித்திருந்தார். வனத்துறை சார்பில் பொதுப்பணித்துறை ஆய்வு செய்ய ஆட்சேபனை இல்லை என்பதை தெரிவித்து விட்டோம்.

வெற்றிவேல், அகமலை: கண்ணக்கரை முதல் மருதையனுார் வரை உள்ள ரோடு அமைக்க நில ஒப்படைப்பு செய்தும், ரோடு அமைக்க வனத்துறை முட்டுக்கட்டை போடுவதால் சிரமம் ஏற்படுகின்றன.

ஆதிரை, வனச்சரகர், பெரியகுளம்: 'பரிவேஸ்' இணைதளத்தில் விண்ணப்பித்து ஊரக வளர்ச்சி முகமை பணிகளை மேற்கொள்ளாமல் தொடர்ந்து காலம் தாழ்த்துவதால், தடையில்லா சான்று வழங்குவதற்கான கால அவகாசம் முடிந்து விட்டன. தற்போது மீண்டும் விண்ணப்பிக்க பரிந்துரைக்க வேண்டும்.

வெற்றிவேல்: பலமுறை விண்ணப்பித்துள்ளோம். ஊரக வளர்ச்சி முகமையின் மெத்தனத்தால் அரசியல் கட்சிகளின் வாக்குறுதியாக உள்ள கண்ணக்கரை ரோடு அமைக்காவிட்டால் எங்கள் கிராம ஊராட்சி மக்கள் சட்டசபை தேர்தலை புறக்கணிக்க முடிவு செய்துள்ளோம், என்றார்.