ADDED : பிப் 09, 2024 01:48 AM
கூடலுார்,:முல்லைப் பெரியாறு அணையில் 10 மாதத்திற்கு பின் நீர்வரத்து 'ஜீரோ' ஆனது.
இந்த அணை நீர்ப் பிடிப்பு பகுதியில் ஜூனில் துவங்கிய தென்மேற்கு பருவ மழையும், நவம்பரில் துவங்கிய வடகிழக்கு பருவ மழையும் கூடுதலாக பெய்யவில்லை. அதிகபட்சமாக வடகிழக்கு பருவமழையால் டிச.,23 ல் நீர்மட்டம் 141 அடியை எட்டியது.
கடந்த 2023 பிப்ரவரி மாதத்தில் அணைக்கு நீர்வரத்து ஜீரோவாக இருந்த நிலையில் அதன்பின் அவ்வப்போது பெய்து வந்த மழையால் தொடர்ந்து நீர்வரத்து இருந்தது. டிச.,19ல் அணைக்கு நீர் வரத்து அதிகபட்சமாக வினாடிக்கு 7404 கன அடியாக இருந்தது.
இந்நிலையில் 10 மாதத்திற்கு பின் நேற்று காலை 6:00 மணி நிலவரப்படி அணைக்கு நீர்வரத்து 'ஜீரோ' ஆனது. நீர்ப்பிடிப்பு பகுதியில் கடுமையான வெப்பம் நிலவுவதால் நீர்மட்டமும் வெகுவாக குறைந்து 133 அடியாக இருந்தது 'மொத்த உயரம் 152 அடி'.
தமிழகப் பகுதிக்கு குடிநீர் மற்றும் இரண்டாம் போக நெல் சாகுபடிக்காக 511 கன அடி திறக்கப்பட்டுள்ளது. நீர் இருப்பு 5399 மில்லியன் கன அடியாகும். தற்போதுள்ள அணை நீர்மட்டம் இரண்டாம் போக நெல் சாகுபடிக்கு போதுமானதாக இருந்த போதிலும் கோடை மழை பெய்தால் நீர்மட்டம் சற்று உயர்ந்து ஜூனில் முதல் போக நெல் சாகுபடிக்கு தண்ணீர் திறக்க வாய்ப்பு ஏற்படும்.
