கல்லிடைக்குறிச்சி, சிங்கம்பட்டி உள்ளிட்ட பகுதிகளில் கரடி நடமாட்டம் இருந்தது. நேற்று கல்லிடைக்குறிச்சி அருகே பொட்டல் கிராமத்தில் மணிமுத்தாறு 80 அடி கால்வாய் அருகே தனியார் மாந்தோப்பில் தோட்டத்தில் இரை தேடி குட்டியுடன் கரடி ஒன்று சுற்றித் திரிந்தது.

அப்போது அந்த கரடி குட்டி தோட்டத்தில் பாதுகாப்புக்காக அமைக்கப்பட்டிருந்த வேலியில் சிக்கியது. கரடி குட்டி அதிக சத்தம் போடவே அப்பகுதியில் உள்ள விவசாயிகள் அம்பாசமுத்திரம் வனத்துறையினருக்கு தகவல் தெரிவித்தனர்.

வனத்துறையினர் வேலியில் சிக்கியிருந்த சுமார் ஒரு வயது மதிக்கத்தக்க பெண் கரடி குட்டியை ஒரு மணி நேரத்திற்கு மேலாக போராடி பத்திரமாக வேலியில் இருந்து விடுவித்தனர். தொடர்ந்து அந்த கரடி குட்டி அடர்ந்த வனப்பகுதிக்குள் சென்றது.