ரூ.1 கோடி நிலமோசடி:ஆள்மாறாட்டம் செய்தவர் கைது

கோடம்பாக்கம், ரங்கராஜபுரம் பிரதான சாலையைச் சேர்ந்தவர் ஷீலா அப்பாவு, 60. இவர், ஜூலை 29 ம் தேதி, ஆவடி மத்திய குற்றப்பிரிவில் புகார் ஒன்று அளித்திருந்தார். அதில் குறிப்பிட்டு இருந்தாவது:. நான், கேரளாவில் வசிக்கும் என் அண்ணன் பிலிப் ஜோசப் என்பவருடன் சேர்ந்து, 1999ல், அம்பத்துார், பட்டரவாக்கம், ஞானமூர்த்தி நகரில் 5,580 சதுர அடி நிலத்தை வாங்கி, இருவரும் தலா 2,790 சதுர அடி நிலத்தை பிரித்து கொண்டோம்.அண்ணன் அவரது நிலத்தை, நிலத்தரகர் வாயிலாக, கோவிந்தராஜ் என்பவருக்கு கடந்த 2022ல் விற்றுள்ளார். அருகில் இருந்த என் நிலத்தையும், அதே நிலத்தரகர் போலி ஆவணங்கள் தயாரித்து விற்பனை செய்துள்ளார்.
என் நிலத்தில் அடையாளம் தெரியாத நபர் ஒருவர் சுற்றுச்சுவர் கட்டி வருவதாக தகவல் கிடைத்தது. நிலத்தின் வில்லங்க சான்றை சரிபார்த்தபோது, என்னை போல் ஆள்மாறாட்டம் செய்து விற்பனை செய்தது தெரிந்தது. அந்த நிலத்தின் மதிப்பு 1 கோடி ரூபாய். நிலத்தை விற்றவர்கள் மீது நடவடிக்கை எடுக்க வேண்டும்.இவ்வாறு அந்த புகாரில் குறிப்பிட்டு இருந்தார். இது குறித்து விசாரித்த போலீசார், ஆள்மாறாட்டத்தில் ஈடுபட்ட கொடுங்கையூர், காந்தி நகரைச் சேர்ந்த லீலாவதி, 54, என்பவரை கைது செய்து, நேற்று முன்தினம் சிறையில் அடைத்தனர். தலைமறைவாக உள்ள முக்கிய குற்றவாளிகளை தேடி வருகின்றனர்.