மீனவர்கள் சுருக்குமடி, மாப்பு என, பல்வேறு வகையான வலைகளை பயன்படுத்துகின்றனர். இதில், மாப்பு வலையை பயன்படுத்துவதால், மீன் கூட்டம் கலைந்துவிடுவதாகவும், தொழில் பாதிப்பு ஏற்படுவதாகவும் கூறப்படுகிறது.

இதை அனைத்து மீனவ கிராமங்களும் பயன்படுத்த வேண்டாம் என, மீனவர்களுக்குள் கட்டுப்பாடு விதித்துக் கொண்டனர். அதே சமயம், கோரைகுப்பம் மீனவ கிராமத்தினர் பல தலைமுறைகளாக இந்த வலையை மட்டுமே பயன்படுத்தி தொழில் செய்து வருகின்றனர். தொடர்ந்து அந்த வலையை பயன்படுத்தினர்.

கோரைகுப்பம் கிராம மீனவர்கள் பயன்படுத்தும் மாப்பு வலையால் மீன்வளம் பாதிப்பதாக கூறி, மற்ற கிராமத்தினர் எதிர்ப்பு தெரிவித்ததால் பிரச்னை ஏற்பட்டது. கோரைகுப்பம் மீனவர்கள், தாங்கள் பயன்படுத்தும் மாப்பு வலைக்கு தடை இல்லை எனக்கூறி, தொடர்ந்து அந்த வலையை பயன்படுத்தினர்.

கடந்த மாதம் 27ம் தேதி கடலில் மாப்பு வலையை பயன்படுத்தி மீன்பிடித்துக் கொண்டிருந்த கோரைகுப்பம் மீனவர்களிடம், மற்ற மீனவ கிராமத்தினர் தகராறு செய்து, மாப்பு வலைகளை அறுத்து சேதப்படுத்தினர்.

இதுகுறித்து கோரைகுப்பம் மீனவர்கள், பொன்னேரி ஆர்.டி.ஓ., கனிமொழியிடம் புகார் தெரிவித்தனர். மீன்வளத்துறை வாயிலாக உரிய தீர்வு காணப்படும் என தெரிவிக்கப்பட்டது. நேற்று, பழவேற்காடு கடலோர அனைத்து மீனவ கிராமங்களின் நிர்வாகிகளிடம் அதிகாரிகள் பேச்சுவார்த்தை மேற்கொண்டனர்.

பொன்னேரி தாசில்தார் சோமசுந்தரம் தலைமையில், மீன்வளத்துறை உதவி இயக்குனர் அஜய் ஆனந்த் மற்றும் காவல்துறையினர், மீனவர்களின் மீன்பிடி தொழில் தொடர்பான பிரச்னை குறித்து விரிவாக கேட்டறிந்தனர்.

இந்த கூட்டத்தில், கோரைகுப்பம் மற்றும் மற்ற மீனவ கிராம நிர்வாகிகள் பங்கேற்று கருத்துக்களை தெரிவித்தனர். மாப்பு வலைகளை பயன்படுத்துவது தொடர்பாக மீனவர்களுக்கு ஒருமித்த கருத்து ஏற்படவில்லை.

இதையடுத்து, 10 நாட்களுக்கு தற்காலிகமாக மாப்பு வலையை அனைத்து மீனவ கிராமத்தினரும் பயன்படுத்த வேண்டாம் எனவும், மீனவர்களுக்குள் ஒருமித்த கருத்து ஏற்பட, மீண்டும் 10 நாட்களில் பேச்சுவார்தை நடத்துவது எனவும் முடிவு செய்யப்பட்டது. அதுவரை மீனவர்கள் சட்டம் - ஒழுங்கு பிரச்னைகளில் ஈடுபடக் கூடாது எனவும் அறிவுறுத்தப்பட்டது.