திருவள்ளூர் அரசு பேருந்து பணிமனையில் இருந்து, ஊத்துக்கோட்டைக்கு ஒரு பேருந்து மட்டுமே இயக்கப்படுகிறது. மற்றவை தனியார் பேருந்துகள். இதில் பயணியரை புளிமூட்டை போல ஏற்றிச் செல்கின்றன. இதனால் மாணவர்கள், வேலைக்குச் செல்பவர்கள் அவதிப்படுகின்றனர்.

பாடியநல்லுார் மாநகர பேருந்து பணிமனையில் இருந்து, செங்குன்றம் - ஊத்துக்கோட்டை இடையே, எட்டு மாநகர பேருந்துகள் இயக்கப்படுகின்றன. திருவள்ளூரில் இருந்து வெள்ளியூர், தாமரைப்பாக்கம், வெங்கல் வழியே பெரியபாளையத்திற்கு மாநகர பேருந்து இயக்கப்படுகிறது.

ஆனால், திருவள்ளூர் - ஊத்துக்கோட்டை வழித்தடத்தில் மாநகர பேருந்து இயக்கவில்லை. எனவே, மாணவர்கள், வேலைக்குச் செல்பவர்கள் நலன் கருதி மேற்கண்ட வழித்தடத்தில் மாநகர பேருந்து இயக்க வேண்டும் என கோரிக்கை எழுந்துள்ளது.

இதுகுறித்து, கும்மிடிப்பூண்டி தி.மு.க., - எம்.எல்.ஏ., கோவிந்தராசன் கூறுகையில், “சமீபத்தில் ஆவடி - ஆரணி மாநகர பேருந்து, புதுவாயல் வரை நீட்டிக்கப்பட்டு உள்ளது. விரைவில், திருவள்ளூர் - ஊத்துக்கோட்டை இடையே மாநகர பேருந்து இயக்க நடவடிக்கை எடுக்கப்படும்” என்றார்.