திருப்பூர், முதலிபாளையம், நிப்ட்-டீ கல்லுாரியில், தெற்கு குறுமைய மாணவியர் கபடி போட்டி நேற்று நடந்தது. 14 வயது பிரிவில், சர்க்கார் பெரியபாளையம் அரசு மேல்நிலைப்பள்ளி 35 - 10 என்ற புள்ளிக்கணக்கில் மணி பப்ளிக் அணியை வீழ்த்தியது. 17 வயது பிரிவிலும் அசத்திய, சர்க்கார் பெரியபாளையம் பள்ளி அணி, 33 - 29 என்ற புள்ளிக்கணக்கில், விவேகானந்தா வித்யாலயா அணியை வென்றது.

பத்தொன்பது வயது பிரிவில், விஜயாபுரம் அரசு மேல்நிலைப்பள்ளி அணி - வீரபாண்டி அரசு மேல்நிலைப்பள்ளி அணி மோதிய போட்டி, துவக்கம் முதலே விறுவிறுப்பாக இருந்தது. அடுத்தடுத்து இரு அணி வீராங்கனைகளும் புள்ளிகளை குவிக்க, ஆட்ட நேர இறுதியில், 26 - 26 என்ற சமநிலை எட்டியது. கூடுதல் நேர ஒதுக்கீட்டில் நடந்த போட்டியில், 6 - 5 என்ற புள்ளிக்கணக்கில் விஜயாபுரம் அணி, வெற்றி பெற்று அசத்தியது; வீரபாண்டி பள்ளி அணி போராடி தோற்றது.

மாணவர் கபடி, 14 வயது பிரிவில், கே.எஸ்.சி., அரசு மேல்நிலைப்பள்ளி அணி - வீரபாண்டி அரசு மேல்நிலைப்பள்ளி அணியை, 47 - 27 என்ற புள்ளிக்கணக்கில் வென்றது.

கோகோ; கே.எஸ்.சி., அசத்தல்

தெற்கு குறுமைய மாணவர் கோகோ போட்டியில், 14 வயது பிரிவில், கே.எஸ்.சி., அரசு மேல்நிலைப்பள்ளி அணி, கொங்கு மெட்ரிக் பள்ளி அணியை, 12 - 9 என்ற புள்ளிக்கணக்கிலும், 19 வயது பிரிவில், கே.எஸ்.சி., அரசு மேல்நிலைப்பள்ளி அணி, மணி பப்ளிக் பள்ளி அணியை, 5 - 7 என்ற புள்ளிக்கணக்கிலும் வென்றது.