திருப்பூர் மாநகரின் ஒரு குடியிருப்பு பகுதியில், வீட்டு வாசலில் ஒரு குப்பைப் பை தயாராக இருந்தது.

அந்த வீட்டில் நேற்று இரவு சமைத்த காய்கறிகளின் தோல்கள், மீதமான உணவுக் கழிவுகள், பால் பாக்கெட், பிளாஸ்டிக் பை, உடைந்த கண்ணாடித் துண்டு, பயன்படுத்தப்பட்ட மருந்து – மாத்திரை கவர் என எல்லாமே ஒரே பையில் இருந்தன.

சிறிது நேரத்தில் மாநகராட்சி துாய்மைப் பணியாளர் வந்தார். வழக்கம்போல அந்தப் பையை வாங்கிச் சென்றார்.

அவருக்கு அது ஒரு குப்பைப் பை.

ஆனால், அந்தப் பைக்குள் இருந்த ஒவ்வொரு பொருளுக்கும் ஒவ்வொரு பயணம் இருந்தது.

காய்கறித் தோல்கள் மண்ணோடு கலந்து உரமாக மாற வேண்டியவை. பிளாஸ்டிக் பொருட்கள் மறுசுழற்சிக்கு செல்ல வேண்டியவை. கண்ணாடி மற்றும் பிற கழிவுகள் தனியாக கையாளப்பட வேண்டியவை.

ஆனால், எல்லாம் ஒன்றாக கலந்துவிட்டதால், அவற்றை மீண்டும் பிரிப்பது எளிதல்ல.

இதுதான் திருப்பூர் மாநகரின் திடக்கழிவு மேலாண்மை திட்டம் எதிர்கொள்ளும் முக்கிய சவால்களில் ஒன்று.

மாநகராட்சி விதிமுறைப்படி, வீடுகளில் இருந்து வெளியேறும் கழிவுகளை நான்கு வகையாக பிரித்து வழங்க வேண்டும். மக்கும் குப்பை, மக்காத குப்பை மற்றும் பிற வகை கழிவுகளை தனித்தனியாக வழங்கினால், அவற்றை கையாள்வது எளிதாகும்.

ஆனால், ஒரு நகரத்தின் பழக்கத்தை ஒரே நாளில் மாற்றிவிட முடியாது.

பல ஆண்டுகளாக, வீட்டில் உள்ள அனைத்துக் கழிவுகளையும் ஒரே பையில் போட்டு வெளியே வைப்பதுதான் நமது வழக்கமாக இருந்து வருகிறது. இப்போது, அதை மாற்ற வேண்டும் என்று சொன்னால், அதற்கு காலமும், தொடர் விழிப்புணர்வும் தேவை.

இதில் பொதுமக்களை மட்டும் குறை சொல்லிவிடவும் முடியாது.

குப்பையை எந்தெந்த வகையாக பிரிக்க வேண்டும்? எந்த குப்பையை எந்தத் தொட்டியில் போட வேண்டும்? தினமும் சேகரிப்பு எப்படி நடைபெறும்? என்ற கேள்விகளுக்கு எளிமையான, தெளிவான விளக்கம் ஒவ்வொரு வீட்டுக்கும் சென்றடைய வேண்டும்.

அதோடு, குப்பையை பிரித்து வழங்கும் மக்களின் முயற்சியும் வீணாகாமல் இருப்பதை உறுதி செய்ய வேண்டியது மாநகராட்சியின் பொறுப்பு.

திருப்பூர் என்பது உழைப்பால் வளர்ந்த நகரம். காலை முதல் இரவு வரை இயந்திரங்களும், தொழிற்சாலைகளும், வணிக நிறுவனங்களும் இயங்கும் நகரம். வேலை தேடி வந்தவர்களையும் வாழ வைத்த நகரம்.

அப்படிப்பட்ட ஒரு நகரம், தன்னுடைய கழிவுகளையும் அறிவியல்பூர்வமாக கையாள கற்றுக்கொள்வது அவசியம்.

ஒரு வீட்டில் இரண்டு அல்லது நான்கு குப்பைத் தொட்டிகளை வைப்பது பெரிய விஷயம் அல்ல. ஆனால், அந்தச் சிறிய மாற்றம் ஒரு பெரிய நகரத்தின் எதிர்காலத்தை மாற்றக்கூடியது.

குப்பையை பிரிப்பது மாநகராட்சிக்காக அல்ல.

குப்பையை எடுக்கும் துாய்மைப் பணியாளருக்காக மட்டும் அல்ல.

நமது தெருவுக்காகவும், நமது குழந்தைகளுக்காகவும், நமது திருப்பூருக்காகவும்.

அடுத்த முறை வீட்டில் குப்பைப் பையை தயாரிக்கும்போது ஒரு நிமிடம் யோசிப்போம்.

இந்தக் குப்பை எங்கே செல்லப் போகிறது?

அந்த ஒரு கேள்வியில்தான், துாய்மையான திருப்பூருக்கான மாற்றத்தின் முதல் பதில் இருக்கிறது.

– துாய்மையாளன்.