திருப்பூர், மங்கலம் ரோடு, கே.வி.ஆர்., நகரைச் சேர்ந்தவர் முகமது பீர்சுல்தான், 46. கடந்த 2023ம் ஆண்டில், குமரப்பபுரம் 3வது வீதியில், ரோட்டில் விளையாடிக் கொண்டிருந்த 9 வயது சிறுமியின் கவனத்தை திருப்பி, அவர் அணிந்திருந்த 2 பவுன் தங்க செயினைப் பறித்துக் கொண்டு தப்பினார்.

இது குறித்து சிறுமியின் தாய், தெற்கு போலீசில் புகார் அளித்தார். வழக்கு பதிவு செய்து விசாரித்த போலீசார், இதில் ஈடுபட்ட முகமது பீர் சுல்தானைக் கைது செய்தனர்.

இது தொடர்பான வழக்கில், ஜே.எம்.எண்: 1 கோர்ட்டில் கடந்த 2024ல் தீர்ப்பளிக்கப்பட்டது. செயின் பறிப்பில் ஈடுபட்ட அவருக்கு 3 ஆண்டு சிறைத் தண்டனையும் 10 ஆயிரம் ரூபாய் அபராதமும் விதிக்கப்பட்டது.

இந்த தீர்ப்புக்கு எதிராக, மேல் முறையீடு செய்யப்பட்டது. இம் மனு, திருப்பூர் மாவட்ட எஸ்.சி.- எஸ்.டி. சிறப்பு கோர்ட்டில் நீதிபதி சுரேஷ் முன்னிலையில் விசாரணைக்கு வந்தது. அரசு தரப்பில் கூடுதல் அரசு வக்கீல் விவேகானந்தம் ஆஜரானார். விசாரித்த நீதிபதி, அப்பீல் மனுவை தள்ளுபடி செய்து, ஜே.எம். கோர்ட் விதித்த தண்டனையை உறுதிப்படுத்தி உத்தரவிட்டார்.