திருப்பூர் வருவாய் மாவட்ட பகுதிகளை உள்ளடக்கி, மூன்று வணிகவரி மாவட்டங்களுடன், கடந்த 2024, ஜூலை மாதம் முதல், திருப்பூர் வணிக வரி கோட்டம் செயல்பட்டு வருகிறது. வணிக வரி இணை கமிஷனர் (நிர்வாகம்), நுண்ணறிவு பிரிவு இணை கமிஷனர் மற்றும் துணை கமிஷனர் அலுவலகங்கள், தணிக்கை பிரிவுகளை உள்ளடக்கி திருப்பூர் வணிக வரி கோட்ட அலுவலகம் மற்றும் மூன்று வணிக வரி மாவட்டத்துக்கான துணை கமிஷனர் அலுவலகங்கள் செயல்பட்டு வருகிறது.

திருப்பூர் வணிக வரி கோட்டம் உருவாக்கப்பட்டபோதும், மேல்முறையீட்டு அலுவலகம் இல்லாததால், வர்த்தகர்களும், ஆடிட்டர்களும் மிகவும் சிரமப்படுகின்றனர்.

வரி செலுத்தியது, ரிட்டர்ன் தாக்கல் குறைபாடுகள், நுண்ணறிவு பிரிவினரின் தணிக்கைகள் அடிப்படையில் அதிகாரிகளால் பிறப்பிக்கப்படும் உத்தரவுகள், அபராதங்கள் தொடர்பாக மேல் முறையீடு செய்வதற்கு, திருப்பூர் மாவட்ட வர்த்தகர்கள், ஈரோடு அலுவலகத்தையே நாடவேண்டியுள்ளது.

மேல் முறையீடுகளில் காலதாமதம் ஏற்படுவதையடுத்து, திருப்பூரில் மேல் முறையீட்டு அலுவலகம் அமைக்கவேண்டும் என, வர்த்தகர்களும், ஆடிட்டர்களும், அரசிடம் தொடர்ந்து கோரிக்கை விடுத்துவந்தனர்.

இந்நிலையில் தற்போது, திருப்பூரில் வணிக வரி மேல்முறையீட்டு அலுவலகம் அமைத்து அரசாணை பிறப்பிக்கப்பட்டுள்ளது. இதனால், திருப்பூர் மாவட்ட வர்த்தகர்களும், ஆடிட்டர்களும் மகிழ்ச்சி அடைந்துள்ளனர்.

நுண்ணறிவு பிரிவுவழக்குகள் இது குறித்து, திருப்பூர் வரி பயிற்சியாளர் கூட்டமைப்பு தலைவர் முத்துராமன் கூறியதாவது:

திருப்பூர் வணிக வரி கோட்டத்தில் மேல்முறையீட்டு அலுவலகம் இல்லாதது மிகப்பெரிய குறையாக இருந்துவந்தது. திருப்பூர், ஈரோடு, கரூர் ஆகிய மூன்று மாவட்ட வர்த்தகர்களும், மேல் முறையீடுகளுக்கு, ஈரோடு அலுவலகத்தையே நாடவேண்டியுள்ளது. இதனால், வழக்கு விசாரணைகளில் காலதாமதம் ஏற்பட்டன. வீண் அலைச்சல் மட்டுமின்றி, வர்த்தகர்களுக்கு நியாயம் கிடைப்பதிலும் காலதாமதம் ஏற்படுகிறது.

அரசிடம் தொடர்ந்து கோரிக்கை விடுக்கப்பட்டுவந்தநிலையில் தற்போது, திருப்பூரில் வணிக வரி மேல்முறையீட்டு அலுவலகம் அமைத்து உத்தரவிடப்பட்டுள்ளது. திருப்பூர், குமார் நகரிலுள்ள வணிகவரித்துறை துணை கமிஷனர் அலுவலகத்துடன் இணைந்து, மேல்முறையீட்டு அலுவலகம் இயங்க உள்ளது. துணை கமிஷனர் தலைமையில், துணை வணிக வரி அலுவலர் 2 பேர் உட்பட அலுவலர்கள் நியமிக்கப்படுகின்றனர்.

இந்த அலுவலகத்தில், திருப்பூர் வணிக வரி கோட்டத்திலுள்ள, நிர்வாகம், நுண்ணறிவு பிரிவு சார்ந்த வழக்குகள் மட்டுமே கையாளப்படும். இதனால், வர்த்தகர்கள், அருகாமையிலும், விரைவாகவும் மேல்முறையீடு செய்யமுடியும்; வழக்கு விசாரணைகள் துரிதமாக நடைபெற்று, வர்த்தகர்களுக்கு உரிய இழப்பீடுகள் அல்லது அரசுக்கு வருவாய் தாமதமின்றி கிடைக்கும்.

இவ்வாறு அவர் கூறினார்.