உடுமலை பகுதிகளில் மக்காச்சோளம் சாகுபடி பிரதானமாக உள்ளது. தற்போது இப்பகுதிகளில் அறுவடை தீவிரமடைந்துள்ள நிலையில், விவசாயிகள் ஒழுங்கு முறை விற்பனைக்கூடத்திற்கு கொண்டு வந்து, உலர் களத்தில் காய வைத்து, இ - நாம் திட்டத்தின் கீழ் விற்பனை செய்து வருகின்றனர்.

நேற்று, ஒழுங்கு முறை விற்பனைக்கூடத்திற்கு, ஆறு விவசாயிகள், 413 குவிண்டால் மக்காச்சோளம் விற்பனைக்கு கொண்டு வந்திருந்தனர். தேசிய மின்னணு வேளாண் சந்தை (இ - நாம்) திட்டத்தின் கீழ், பட்டியலிடப்பட்டது.

பல்வேறு விவசாயிகள் ஏல முறையில் விலை கேட்டதில், விலை இறுதி செய்யப்பட்டது. ஒரு கிலோ, அதிகபட்சமாக, குவிண்டால் ரூ.2,310க்கும், குறைந்த பட்சமாக, ரூ.2,280க்கும் விற்பனையானது. மொத்தம், 24.88 டன் மக்காச்சோளம், 5 லட்சத்து, 69 ஆயிரத்து, 610 ரூபாய்க்கு விற்பனையானது.

இ - நாம் திட்டத்தின் கீழ், தேசிய அளவிலான வியாபாரிகள் பங்கேற்பதோடு, இடைத்தரகர்கள் இல்லாமல், கூடுதல் விலைக்கு விற்பனை செய்யலாம். உடனடியாக விவசாயிகள் வங்கி கணக்கில் பணம் வரவு வைக்கப்படுகிறது.

விவசாயிகள் தங்கள் விளை பொருட்களை, ஒழுங்கு முறை விற்பனை கூடத்தில், இ - நாம் திட்டத்தின் கீழ் விற்பனை செய்து பயன்பெறலாம். மேலும் விபரங்களுக்கு, 94439 62834 என்ற எண்ணில் தொடர்பு கொள்ளலாம், என ஒழுங்கு முறை விற்பனைக்கூட கண்காணிப்பாளர் செந்தில்குமார் தெரிவித்தார்.