குறிப்பாக, 100 கோடி ரூபாய் முதலீடு செய்து, அடுத்த மூன்று ஆண்டுகளில், 300 கோடி ரூபாய் 'டர்ன் ஓவர்' மற்றும் 300 கோடி ரூபாய் முதலீட்டில், அடுத்த மூன்று ஆண்டுகளில், 900 கோடி 'டர்ன் ஓவர்' என்ற வகையில் திட்டம் அறிவிக்கப்பட்டது. இதனால், குறு, சிறு தொழில்களை புதுப்பிக்கவும், துவக்கவும் வாய்ப்பே இல்லாமல் போய்விட்டது.

'பி.எல்.ஐ., - 2.0' திட்டம் அறிவிப்போடு நின்றுவிட்டது. அத்திட்டத்தை சீரமைத்து, பருத்தி நுாலிழை ஆடை தொழிலும் இணைக்கப்படும் என, மத்திய அரசு அறிவித்திருந்தது. இந்நிலையில், ''ஆடை உற்பத்திக்கான, 'பி.எல்.ஐ.,' திட்டம் விரைவில் பிரத்யேகமாக அறிவிக்கப்படும்'' என, மத்திய ஜவுளித்துறை அமைச்சர் கிரிராஜ் சிங் நேற்று முன்தினம் அறிவித்துள்ளார்.

இத்தகைய அறிவிப்பு, கடந்த நான்கு ஆண்டுகளாக எதிர்பார்த்து காத்திருந்த திருப்பூருக்கு, உற்சாகமூட்டுவதாக அமைந்துள்ளது. இருப்பினும், அதிகபட்ச நிபந்தனைகளை தளர்த்தி, குறு, சிறு தொழில்களும் திட்டத்தால் பயன்பெறும் வகையில், விதிமுறைகள் மற்றும் நிபந்தனையை தளர்த்த வேண்டும் என்று கோரிக்கை விடுக்கப்பட்டுள்ளது.

'பி.எல்.ஐ.,' திட்டம் அறிவிக்கப்பட்ட போது, பெரும் எதிர்பார்ப்புடன் திருப்பூர் பின்னலாடை துறையினர் காத்திருந்தனர். அப்போது, நுால் விலை உயர்வு, போர் சூழல், பணவீக்கம் என, களநிலவரம் சரிவர ஒத்துழைக்கவில்லை. ஆவலுடன் எதிர்பார்த்த பி.எல்.ஐ., திட்டம் புஸ்வாணமாக மாறிவிட்டதாக, தொழில்துறையினர் புலம்பினர். இந்நிலையில், புதிய அம்சங்களுடன் வரப்போகும் திட்டம், உண்மையாகவே பயனளிக்கும் வகையில் வடிவமைக்கப்பட வேண்டும் என்ற எதிர்பார்ப்பு அதிகரித்துள்ளது.