ஒவ்வொரு மண்டல பாசனத்தின் போதும், இந்த கால்வாய் உடைந்து, நீர் நிர்வாகத்தில் சிக்கல் ஏற்படுகிறது. இது குறித்து, தமிழக அரசு தரப்பில் போதுமான நடவடிக்கைகள் எடுக்கப்படவில்லை.

நான்காம் மண்டல பாசனத்தின் போது, தண்ணீர் திறப்பில், பல்வேறு குளறுபடிகள் ஏற்பட்டு, பல ஆயிரம் ஏக்கரில் மக்காச்சோளம் சாகுபடி பாதித்தது; குளங்களுக்கு தண்ணீர் கேட்டும் விவசாயிகள் தொடர்ந்து வலியுறுத்தினர். ஆனால், விவசாயிகள் கோரிக்கையை பரிசீலிக்கவே இல்லை.

இதனால், முன்னதாகவே துவங்கி கொளுத்தி வரும் கோடை வெப்பத்தால், அனைத்து பகுதிகளிலும், வறட்சி துவங்கியுள்ளது. நிலத்தடி நீர்மட்டம் சரிந்து, நிலங்கள் சாகுபடியின்றி தரிசாகும் நிலை உருவாகியுள்ளது.

தேங்காய், கொப்பரை விலை வீழ்ச்சியால், பல லட்சம் தென்னை விவசாயிகள், தொழிலாளர்கள் வாழ்வாதாரம் கேள்விக்குறியாகியுள்ளது.

தேங்காய் உடைப்பு போராட்டம் என அரசின் கவனத்தை ஈர்க்க, விவசாயிகள் நடத்திய போராட்டம் அனைத்தும் வீணானது. அ.தி.மு.க., ஆட்சிக்காலத்தில், வறட்சியால் பாதித்த தென்னை விவசாயிகளுக்கு, நிவாரணம் வழங்கப்பட்டது. அதற்கான முயற்சிகளையும் கண்டுகொள்ளவில்லை. தேர்தல் நெருங்கும் நேரத்தில், பிரச்னைகளை மறைக்க கொப்பரை கொள்முதல் குறித்த அறிவிப்பு வெளியிடப்பட்டுள்ளதாக விவசாயிகள் வேதனை தெரிவிக்கின்றனர்.

பி.ஏ.பி., நான்காம் மண்டல பாசனத்தில், இரண்டு சுற்று மட்டும் தண்ணீர் திறக்கப்பட்டதால், மக்காச்சோளத்தில், விளைச்சல் பாதியானது; பாதித்தவர்களுக்கும், காப்பீடு செய்தவர்களுக்கும் இதுவரை இழப்பீடு கிடைக்கவில்லை.

விவசாயிகள் கூறியதாவது: வாழ்வாதார பிரச்னைகளை முன்வைத்து போராடியும், தி.மு.க., மக்கள் பிரதிநிதிகள் விவசாயிகளை கண்டுகொள்ளவில்லை.

குறைந்தபட்சம் விவசாய சங்க பிரதிநிதிகளையாவது அழைத்து பேசியிருக்கலாம். எந்த பிரச்னையும் கண்டுகொள்ளப்படாததால், விவசாயிகள் விரக்தியில் உள்ளனர். கோட்ட, மாவட்ட அளவிலான விவசாயிகள் குறை தீர் கூட்டத்தில் வழங்கும் மனுக்கள் மீதும் எவ்வித நடவடிக்கையும் எடுப்பதில்லை.

இறுதியாக, வரும் தேர்தல் அறிக்கையில், பயிர்க்கடன் ரத்து என்ற அறிவிப்பையாவது தி.மு.க., வினர் வெளியிட வேண்டும்.

இவ்வாறு, விவசாயிகள் தெரிவித்தனர்.