சாலையோரம் உள்ளிட்ட பொது இடங்களில் பேனர், தட்டி வைக்க, பல கட்டுப்பாடுகள் விதிக்கப்பட்டுள்ளன. சம்மந்தப்பட்ட உள்ளாட்சி நிர்வாகத்தினர், நெடுஞ்சாலைத்துறையினர் மற்றும் போலீசாரிடம் அனுமதி பெற்று, அவர்கள் அனுமதி வழங்கும் இடத்தில் மட்டும் தான், பேனர், தட்டி வைக்க வேண்டும். தற்போது, திருமுருகன்பூண்டி திருமுருகநாத சுவாமி கோவில் தேர்த் திருவிழா நடந்து வருகிறது.

இதையொட்டி, அப்பகுதியில் உள்ள நெடுஞ்சாலை, கோவில் வளாகம் மற்றும் சிக்னல் உள்ள இடங்களில், அவற்றை மறைத்து, 70க்கும் மேற்பட்ட 'மெகா' பிளக்ஸ் பேனர்கள் வைக்கப்பட்டுள்ளன. அரசியல் கட்சியினர், பல்வேறு அமைப்பினர் சார்பில் வைக்கப்பட்டுள்ள பேனர்கள், விபரீதத்துக்கு வித்திடும் வகையில் இருப்பதாக புகார் எழுந்திருக்கிறது.

வியாபாரிகள் கூறுகையில், ''கடைகளை மறைத்து வைக்கப்பட்டுள்ள 'பேனர்'களால் வியாபாரம் பாதிக்கும்; நஷ்டம் ஏற்படும். பலத்த காற்று வீசும் போது, 'பேனர்' விழுவதற்கும் வாய்ப்புண்டு.

பேனர் வைக்க போலீசார் மற்றும் நகராட்சியிடம் அனுமதி பெற்றதாகவும் தெரியவில்லை. அப்படி அனுமதி பெற்றிருந்தால், மக்களுக்கு இடையூறாக 'பேனர்' வைக்க, அதிகாரிகள் அனுமதி வழங்கியிருக்க மாட்டார்கள்.

பேனர்களை அகற்ற உரிய நடவடிக்கை எடுக்க வேண்டும். வியாபாரிகள், பொதுமக்களுக்கு இடையூறு இல்லாத இடத்தில் அவற்றை வைத்துக் கொள்ள அறிவுறுத்த வேண்டும்'' என்றனர்.